மனோகணேசன் எம்.பி ஜெனரல் சரத்பொன்சேகா சந்திப்பு !

ஜனநாயக மக்கள் முன்னணியின் தலைவரும் கொழும்பு மாவட்ட பாராளுமன்ற உறுப்பினருமான மனோகணேசன் எதிர்க்கட்சிகளின் சார்பில் பிரதான ஜனாதிபதி வேட்பாளராக போட்டியிடும் ஜெனரல் சரத் பொன்சேகாவை சந்தித்து பேச்சுவார்த்தை நடத்தியுள்ளார். கொழும்பில் இன்று இடம்பெற்ற இப்பேச்சுவார்த்தையின் போது ஜனநாயக மக்கள் முன்னணியின் முக்கிய பிரதிநிதிகள் பலரும் கலந்து கொண்டிருந்தனர். இது தொடர்பாக அக்கட்சி விடுத்துள்ள அறிக்கையில், சரத் பொன்சேகா ஜனாதிபதி தேர்தலில் வெற்றிபெறும் பட்சத்தில் அதனையடுத்து பாராளுமன்ற தேர்தல் நடைபெற்று புதிய அரசாங்கம் பதவியேற்கும் இடைப்பட்ட காலத்திற்குள் உடனடியாக கவனத்தில் எடுக்கப்படவேண்டிய விடயங்கள் தொடர்பில் கலந்துரையாடப்பட்டது. இவ்விடயங்களில் தமிழ்மக்கள் தொடர்பிலான உடனடி பிரச்சினைகளான தடுத்து வைக்கப்பட்டுள்ள கைதிகள், காணாமல் போனோர், போராளிகளின் புனர்வாழ்வு, யுத்தம் காரணமாக இடம்பெயர்ந்தவர்கள், 1983முதல் உள்நாட்டிலும், வெளிநாட்டிற்கும் இடம்பெயர்ந்தோர் மற்றும் அவர்களது மீள்குடியேற்றம், உயர்பாதுகாப்பு வலயங்கள் காரணமாக இடம்பெயர்ந்தோர் மற்றும் அவர்களது நிலங்கள் மீள கையளிக்கப்படல், யாழ்.முஸ்லிம் அகதிகளின் மீள்குடியேற்றம் மலையகத்தோட்டத் தொழிலாளர்களின் வாழ்நிலைமைகள் ஆகியவை சம்பந்தமாக விரிவாக பேசப்பட்டுள்ளது. குறிப்பாக மனோகணேசன் எம்பி கடந்தவார இறுதியில் யாழ்ப்பாணம் சென்றபொழுது அங்கு அவரை சந்தித்த யாழ்.பல்கலைக்கழக சமூகத்தை சார்ந்த விரிவுரையாளர்கள், மாணவர்கள், யாழ் வணிக கழகத்தினர், யாழ் கத்தோலிக்க பேராயர் மற்றும் சிவில் சமூக பிரதிநிதிகள், நல்லை ஆதீன கர்த்தா மற்றும் இந்து சமூகத்தினர், யாழ் இஸ்லாமிய பள்ளிவாசல் சபையினர், அரச சார்பற்ற நிறுவத்தினர், ஊடகவியலாளர்கள் ஆகியோர் தெரிவித்திருந்த கருத்துகள் சரத் பொன்சேகாவிடம் தெரிவிக்கப்பட்டன எனக் குறிப்பிடப்பட்டுள்ளதுடன் சரத் பொன்சேகாவுக்கு மனோ கணேசனுக்குமிடையில் நடைபெற்ற விரிவான பேச்சுவார்த்தை தொடர்பான அறிக்கையை விரைவில் ஊடகங்களுக்கு வழங்குவதாகவும் தெரிவிக்கப்பட்டுள்ளது.