யாழ். ஏழாலை சைவ சன்மார்க்க வித்தியாலயத்தில் ஐந்தாம் வகுப்பு புலமைப்பரிசில் பரீட்சையில் சித்திபெற்ற மாணவர்களுக்கான பாராட்டு விழா இன்று (07.12.2014) ஞாயிற்றுக்கிழமை பாடசாலை மண்டபத்தில் நடைபெற்றது. சைவ சன்மார்க்க வித்தியாலய அதிபர் திருமதி பிரதா சிறீதரன் அவர்களின் தலைமையில் நடைபெற்ற இந்நிகழ்வின் பிரதம விருந்தினராக புளொட் தலைவரும், முன்னாள் பாராளுமன்ற உறுப்பினரும், தமிழ் தேசியக் கூட்டமைப்பின் வட மாகாணசபை உறுப்பினருமாக திரு. தர்மலிங்கம் சித்தார்த்தன் அவர்கள் கலந்து சிறப்பித்திருந்தார். லண்டனில் வசிக்கும் ஏழாலை சைவ சன்மார்க்க வித்தியாலய பழைய மாணவரும், தமிழீழ மக்கள் விடுதலைக் கழகத் தோழருமான திரு. மணிவண்ணன் அவர்களின் நிதியுதவியில் 35 பிள்ளைகளுக்கான பிரத்தியேக வகுப்புகள் ஒழுங்குபடுத்தப்பட்டு நடாத்தப்பட்டு வந்தது. மேற்படி 35 பிள்ளைகளில் 18 பிள்ளைகள் ஐந்தாம் ஆண்டு புலமைப்பரிசில் பரீட்சையில் சித்தியடைந்துள்ளனர். ஏழாலைக் கிராமத்தைச் சேர்ந்த இந்த 35 பிள்ளைகளும் பல்வேறு பாடசாலைகளிலும் இருந்து தெரிவுசெய்யப்பட்ட பிள்ளைகளாவர். மேலும் தோழர் மணிவண்ணன் அவர்கள் அடுத்தவருட புலமைப்பரிசில் பரீட்சைக்குரிய பிரத்தியேக வகுப்புக்கான செலவினையும் செய்வதாக கூறியிருக்கின்றார். அத்துடன் அவரது நிதியுதவியின்கீழ் புலமைப்பரிசில் பரீட்சையில் சித்தியடைந்த பிள்ளைகளுக்கு தலா 2000 ரூபாய் வீதம் வங்கியில் பணம் வைப்பிலிட்டு வங்கிப் புத்தகமும் இன்று வழங்கிவைக்கப்பட்டுள்ளது. இன்றைய பாராட்டு விழா மற்றும் புலமைப்பரிசில் வகுப்புக்களுக்கான ஏற்பாடுகளை ஏழாலையை வசிப்பிடமாகக் கொண்ட கிராம சேவையாளர் ஞானசபேசன் அவர்களும், மல்லி ஆசிரியை மற்றும் மணிவண்ணனின் இளைய சகோதரராகிய ஹரிவண்ணன் ஆசிரியர் அவர்களும் மேற்கொண்டிருந்தமை குறிப்பிடத்தக்கது.
இதேவேளை ஏழாலையில் சொந்தமாக சைவ சன்மார்க்க முன்பள்ளிக்குரிய கட்டிடமொன்றினை அமைப்பதற்காக புளொட் தலைவரும், தமிழ் தேசியக் கூட்டமைப்பின் வட மாகாணசபை உறுப்பினருமாகிய திரு தர்மலிங்கம் சித்தார்த்தன் அவர்களின் மாகாணசபை நிதியிலிருந்து ஒதுக்கப்பட்ட 01லட்சம் ரூபா நிதியில் ஏழாலை சைவ சன்மார்க்க வி;த்தியாலய வளவில் முன்பள்ளிக்கான கட்டிட வேலைகள் ஆரம்பிக்கப்பட்டுள்ளது. இந்த வேலைகள் பூர்த்தியாவதற்கு இன்னமும் நிறைய நிதிகள் தேவையாகவிருக்கின்றது. இதை பல நலன்விரும்பிகள் கொடுப்பதற்கு முன்வந்திருக்கிறார்கள். அதேபோல பலர் கொடுத்து உதவுவார்கள் எனவும் எதிர்பார்க்கப்படுகிறது. மேற்படி முன்பள்ளிக்கான கட்டிட வேலைகள் நடைபெற்று வருவதை புளொட் தலைவர் திரு. தர்மலிங்கம் சித்தார்த்தன் அவர்கள் இன்று பார்வையிட்டார்.
கருத்துகள் இல்லை:
கருத்துரையிடுக