பூர்வீகம்

ஜனாதிபதியின் செயலாளராக லலித் வீரதுங்க மீண்டும் நியமனம்..!

2010-11-22T13:29:00.003+05:30

ஜனாதிபதியின் செயலாளராக லலித் வீரதுங்க மீண்டும் நியமிக்கப்பட்டுள்ளார். இதேவேளை, ஜனாதிபதியின் பிரதம அதிகாரியாக காமினி எஸ்.செனரத்தும் மீண்டும் நியமிக்கப்பட்டுள்ளதாக ஜனாதிபதி செயலகம் அறிவித்துள்ளது. கடந்த 19ம்திகதி முதல் உடனடியாக அமுலுக்குவரும் வகையில் இந்த நியமனங்கள் வழங்கப்பட்டுள்ளன. லலித் வீரதுங்க, காமினி செனரத் ஆகிய இருவரும் ஏற்கனவே இந்த பதவிகளை வகித் தமை குறிப்பிடத்தக்கது

மிருசுவில் ரயில் நிலையம் 20 மில்லியன் ரூபா செலவில் நிர்மாணம்..!

2010-11-22T13:25:00.002+05:30

யாழ்ப்பாணம், மிருசுவில் ரயில் நிலையம் 20 மில்லியன் ரூபா செலவில் புதிதாக நிர்மாணிக்கப்படவுள்ளதாக வடமாகாண ஆளுநர் மேஜர்ஜெனரல் ஜி.ஏ. சந்திரசிறி தெரிவித்துள்ளார். மத்திய மாகாண சபையின் நிதி ஒதுக்கீட்டில் இந்த புகையிரத நிலையம் நிர்மாணிக்கப்படவுள்ளதாக அவர் மேலும் தெரிவித்துள்ளார். மத்திய மாகாண ஆளுநர் டிக்கிரி கொப்பேகடுவ, மாகாண முதலமைச்சர் சரத் ஏக்கநாயக்க தலைமையிலான குழுவினர் எதிர்வரும் 27ம்திகதி சனிக்கிழமை மிருசுவில் பிரதேசத்திற்கு நேரில் விஜயம்செய்து நிலைமைகளை பார்வையிடவுள்ளனர். ரயில் நிலையத்தை புதிதாக நிர்மாணிப்பதற்கென 20 மில்லியன் ரூபாவுக்கான காசோலையை அன்றையதினம் மத்திய மாகாண முதலமைச்சர் டிக்கிரி கொப்பேகடுவ தன்னிடம் கையளிக்கவுள்ளதாக வடமாகாண ஆளுநர் ஜீ.ஏ. சந்திரசிறி தெரிவித்துள்ளார். ரயில் நிலைய நிர்மாணப் பணிக்கான கேள்விப்பத்திரம் வடமாகாண சபையினால் வெகுவிரைவில் கோரப் படவுள்ளதாகத் தெரிவித்த ஆளுநர், மூன்று மாத காலத்திற்குள் நிர்மாணப்பணிகளை நிறைவு செய்ய திட்டமிட்டுள்ளதாக அவர் மேலும் தெரிவித்துள்ளார்

குழந்தை ஒன்றின் முதுகில் காலால் மிதித்து புதுவிதமான வைத்தியம் செய்ததால் அக்குழந்தை மரணம்..!

2010-11-22T13:20:00.003+05:30

குழந்தை ஒன்றின் முதுகில் காலால் மிதித்து புதுவிதமான வைத்தியம் செய்ததால் அக்குழந்தை மரணமான சம்பவமொன்று கேகாலை மாவட்டம் வரக்காபொல பகுதியில் இடம்பெற்றுள்ளது. இருதய நோயால் அவதிப்பட்ட 1வருடமும் 8மாதங்களும் வயதுடைய குழந்தையொன்றுக்கு வைத்திய சிகிச்சை பெறும்பொருட்டு அக்குழந்தையின் பெற்றோர் பௌத்த பிக்கு ஒருவரிடம் ஆலோசனை கேட்டுள்ளனர். அப்போது வரக்காபொல துல்ஹரிய பகுதியில் வசிக்கும் வைத்தியர் ஒருவரின் பெயரைக் கூறி அவரிடம் சென்று சிகிச்சை பெறுமாறு பௌத்த பிக்கு பெற்றோருக்கு அறிவுரை கூறியுள்ளார். இதனையடுத்து உரிய வைத்தியரிடம் குறிப்பிட்ட குழந்தையின் பெற்றோர் குழந்தையை கொண்டு சென்றுள்ளனர். வைத்தியரிடம் குழந்தையை ஒப்படைத்த பின் அவ்வைத்தியர் குழந்தையின் முதுகில் காலால் மிதித்து ஏதோ புதுமுறையில் வைத்தியம் செய்துள்ளார். இதனையடுத்து குழந்தை நினைவிழந்துள்ளது. இதையடுத்து வைத்தியசாலையில் சேர்க்கப்பட்ட குழந்தை மரணமாகியுள்ளது. இக்குழந்தையின் பெற்றோர் வழங்கிய வாக்குமூலத்தையடுத்து மேற்படி வைத்தியர் பொலிஸாரால் கைது செய்யப்பட்டுள்ளார்.

2011ம் நிதியாண்டுக்கான வரவுசெலவுத் திட்டம் இன்று பாராளுமன்றத்தில் சமர்ப்பிப்பு..!

2010-11-22T13:16:00.002+05:30

2011ம் நிதியாண்டுக்கான வரவுசெலவுத் திட்டம் இன்று பாராளுமன்றத்தில் சமர்ப்பிக்கப்படவுள்ளது. நிதியமைச்சர் என்ற ரீதியில் ஜனாதிபதி மஹிந்த ராஜபக்ஷ இன்றுபிற்பகல் 1.35மணிக்கு வரவு செலவுத் திட்டத்தைப் பாராளுமன்றத்தில் சமர்ப்பித்து உரையாற்றவுள்ளார். நீண்டகால மற்றும் குறுகியகால அபிவிருத்தியை அடிப்படையாகக் கொண்டே இவ் வரவுசெலவுத் திட்டம் தயாரிக்கப்பட்டிருப்பதாக நிதியமைச்சு வட்டாரத் தகவல்கள் தெரிவிக்கின்றன. மஹிந்த சிந்தனையில் குறிப்பிடப்பட்டிருப்பதற்கு அமைவாகக் கிராமங்களை அபிவிருத்திசெய்து ஏழை, பணக்காரன் என்ற வர்க்க ஏற்றத்தாழ்வுகளை நீக்கி அனைவருக்கும் சமமாகப் பகிரக்கூடிய வகையிலேயே இவ் வரவுசெலவுத் திட்டம் தயாரிக்கப்பட்டுள்ளது. அபிவிருத்தி அடைந்த நாடாக இலங்கையை மாற்றுவதற்குக் காணப்படும் சவால்களை எதிர்கொள்ளும் வகையில், பாதுகாப்பு, நலன்புரி, கல்வி மற்றும் பொருளாதாரம் போன்ற முக்கிய துறைகள் குறித்து இவ்வரவு - செலவுத் திட்டத்தில் கூடுதல் கவனம் செலுத்தப்பட்டுள்ளது. வறுமை மற்றும் வேலையில்லாப் பிரச்சினையை ஒழிப்பதற்கு முன்னுரிமை வழங்கப்படும். நகரத்தின் பொது வசதிகளை மேம்படுத்தும் செயற்பாடுகளுக்கு அதிக நிதியை ஒதுக்குவதற்கும் தீர்மானிக்கப்பட்டுள்ளது என்றும் நிதியமைச்சு வட்டாரத் தகவல்கள் மேலும் தெரிவித்துள்ளன.

யாழ்ப்பாணம், வண்ணாப்பண்ணையில் அகில இலங்கை சைவப் புலவர் சங்கத்தின் பொன்விழா சைவ மாநாடு..!

2010-11-16T19:35:00.001+05:30

அகில இலங்கை சைவப் புலவர் சங்கத்தின் பொன்விழா சைவ மாநாடு நாளை யாழ்ப்பாணம் வண்ணார்பண்ணை நாவலர் மகா வித்தியாலயத்தில் நடைபெறவுள்ளது. நிகழ்வுக்கு சங்கத்தின் தலைவர் சைவப் புலவர் மு.திருஞான சம்பந்தபிள்ளை தலைமை தாங்கவுள்ளார். யாழ்ப்பாண பல்கலைக்கழக துணைவேந்தர் பேராசிரியர் என்.சண்முகலிங்கன் கௌரவ அதிதியாக கலந்துகொள்ளவுள்ளார். விழாவில் சைவநாதம் பொன்மலர் வெளியீடும், மலரினை யாழ்ப்பாண பல்கலைக்கழக இந்து நாகரிகத்துறைத் தலைவர் கலாநிதி மா. வேதநாதன் அறிமுகம் செய்துவைப்பார். சைவப் பெரியார்களும் மாநாட்டில் கௌரவிக்கப்படவுள்ளனர்.

பேருவளை நகரசபை பகுதியில் 10 கிராமசேவை அதிகாரி பிரிவுகளில் 10 வீதிகளை புனரமைக்க நடவடிக்கை..!

2010-11-16T19:32:00.001+05:30

ஜனாதிபதி மஹிந்த ராஜபக்ஷவின் இரண்டாவது பதவியேற்பு வைபவத்தை முன்னிட்டு பேருவளை நகர சபை பகுதியில் 10 கிராமசேவை அதிகாரி பிரிவுகளில் 10 வீதிகளை புனரமைக்க பேருவளை நகர சபை எதிர்க்கட்சித் தலைவர் இர்பான் முர்ஸி நடவடிக்கை மேற்கொண்டுள்ளார். எதிர்வரும் 20ம்திகதி காலை 10.00 மணிக்கு வீதிப் புனரமைப்பு பணிகள் ஆரம்பித்து வைக்கப்படும். கடற்றொழில், நீரியல்வள அபிவிருத்தி அமைச்சர் டாக்டர் ராஜித சேனாரத்ன, மாகாண சபை உறுப்பினர் எம்.எம்.எம். அம்ஜாத், நகரசபை உறுப்பினர்களான முனவ்வர் ரபாய்தீன், எம்.உஸ்மான் ஹாஜியார் ஆகியோர் ஆரம்ப நிகழ்வில் பங்குபற்றவுள்ளனர். ஒரு வீதிக்கு 6,90,000 ரூபா வீதம் செலவிடப்படும். பொருளாதார அபிவிருத்தி அமைச்சு இதற்கான நிதியை ஜாதிக சவிய, கமநெகும திட்டத்தின் கீழ் ஒதுக்கியுள்ளதாக எதிர்க் கட்சித் தலைவர் இர்பான் முர்சி தெரிவித்துள்ளார்.

யாழில் பஸ்சும் லொறியும் மோதியதில் 07பேர் படுகாயம்..!

2010-11-16T19:30:00.001+05:30

ஊர்காவற்றுறையிலிருந்து யாழ்ப்பாணத்தை நோக்கிப் பயணித்துக் கொண்டிருந்த மினி பஸ்ஸ_ம் புளியங் கூடலிலிருந்து யாழ் நோக்கி சென்றுகொண்டிருந்த லொறியும் நேருக்குநேர் மோதி விபத்துக்குள்ளாகியுள்ளன. இந்த விபத்தில் மினி பஸ்ஸில் பயணித்த 30பேரில் 7பேர் கடும் காயங்களுக்குள்ளாகியுள்ளனர். விபத்துக்குள்ளான மினிபஸ் வீதியிலிருந்து விலகி தடம்புரண்டு கடும் சேதத்துக்குள்ளானது. மினிபஸ் சாரதி உட்பட 7பேருக்கு தலை, முகம், கால், கைகளில் காயங்கள் ஏற்பட்டுள்ளன. காயமடைந்தவர்கள் சர்வதேச செஞ்சிலுவைச்சங்க மற்றும் வேலணை அரசினர் வைத்தியசாலைக்குச் சொந்தமான அம்பியூலன்ஸ்கள் மூலம் யாழ். போதனா வைத்தியசாலைக்கு அழைத்துச் செல்லப்பட்டிருந்தனர். சிலருக்கு சிறுகாயங்கள் ஏற்பட்டதுடன் அவர்கள் வைத்தியசாலையில் சிகிச்சை பெற்று வீடு திரும்பியுள்ளனர்.

பச்சிளம் குழந்தையை மலசலகுழிக்குள் போட்டுவிட்டு தலைமறைவான தாய் கைது..!

2010-11-16T19:28:00.001+05:30

தான் பெற்றெடுத்துள்ள பச்சிளங் குழந்தையை மலசலகுழிக்குள் போட்டுவிட்டு தலைமறைவான நான்கு பிள்ளைகளின் தாயை மாத்தளை பொலிஸார் கைதுசெய்துள்ளனர். குழந்தையின் சடலத்தையும் பொலிஸார் நேற்று முன்தினம் கண்டெடுத்துள்ளனர். மாத்தளை பொலிஸ் பிரிவிலுள்ள சேலைக்கரை எனும் பிரதேசத்தில் தற் காலிகமாக வசித்து வந்துள்ள தாயொருவரே இவ்வாறு செய்துள்ளார். மூன்று நாளைக்கு முன் குழந்தையைப்பெற்ற இவர் அக்குழந்தையை குழிக்குள் போட்டுவிட்டு தனது கணவனுடன் ஏனைய பிள்ளைகளை அழைத்துக் கொண்டு தலைமறைவாகியிருந்த நிலையில் பொலிஸார் கைதுசெய்துள்ளனர். இவ்வாறு தூக்கி வீசிய பச்சிளங்குழந்தை ஆண் குழந்தை என்றும் 2அடி ஆழமுள்ள மலசல குழியொன்றிலேயே இக்குழந்தை போடப்பட்டுள்ளதாகவும் பொலிஸ் விசாரணைகளிலிருந்து தெரியவருகின்றது.

தொலைபேசியினூடாக குறுந்தகவல் அனுப்புவதன் மூலமாக நீர் கட்டணம் செலுத்தும் முறை..!

2010-11-16T19:26:00.001+05:30

தொலைபேசியினூடாக குறுந்தகவல் அனுப்புவதன் மூலமாக நீர் கட்டணம் செலுத்தும் முறையொன்றை நீர் வழங்கல் வடிகாலமைப்பு அமைச்சு அறிமுகப்படுத்தியுள்ளது. ஜனாதிபதியின் இரண்டாவது பதவி ஏற்பு நிகழ்வை முன்னிட்டு நேற்றுமுதல் இந்த புதியமுறை அமுல்படுத்தப்பட்டுள்ளதாக தேசிய நீர் வழங்கல் வடிகாலமைப்புச்சபை கூறியுள்ளது. நீர் கட்டணம் செலுத்துவதை இலகுபடுத்தும் நோக்குடன் இந்தத் திட்டம் அறிமுகப்படுத்தப்பட்டுள்ளது. இது தொடர்பான வைபவம் கொழும்பு தாஜ் சமுத்ரா ஹோட்டலில் நடைபெற்றுள்ளது.

சுனில் ஹந்துன்நெத்திமீது நடத்தப்பட்ட தாக்குதல் அரச பயங்கரவாதத்தின் ஒரு வடிவமே-மனோ கணேசன்..!

2010-11-16T19:24:00.001+05:30

முன்னாள் பாராளுமன்ற உறுப்பினர் பத்மினி சிதம்பரநாதனின் வீட்டில் பேச்சுவார்த்தைகள் நடத்திக் கொண்டிருந்த ஜேவிபி எம்பி சுனில் ஹந்துன்நெத்தி உள்ளிட்ட குழுவினர்மீது நடத்தப்பட்டுள்ள வன்முறை தாக்குதல் அரச பயங்கரவாதத்தின் ஒரு வடிவமாகும் என ஜனநாயக மக்கள் விடுதலை முன்னணியின் தலைவர் மனோகணேசன் தெரிவித்துள்ளார். ஜேவிபி குழுவினர்மீது நடத்தப்பட்ட தாக்குதல் தொடர்பாக ஜனநாயக மக்கள் விடுதலை முன்னணி விடுத்துள்ள ஊடக அறிக்கையிலே மனோ கணேசன் இதனைத் தெரிவித்துள்ளார். ஜேவிபியை விரும்பாத தமிழ்மக்கள் நடத்திய தாக்குதல் என்று வர்ணிப்பது மக்களை முட்டாளாக்கும் நடவடிக்கையாகும். அரச பயங்கரவாதம் தமிழ்மக்களுக்கு புதிய ஒரு விடயம் அல்ல. அதிலும் குறிப்பாக யாழ்ப்பாணத்தில் வாழும் மக்களுக்கு இது பழகிப்போன விடயமாகும். அரச பயங்கரவாதத்தின் மூலமான அனுபவங்களை தமிழ்மக்கள் மறக்கமுடியாது. 1971லும், 1989லும் அரச பயங்கரவாதத்தின் தாக்கங்களை அனுபவித்த ஜேவிபி சமீபகாலமாக அவற்றை மறந்திருந்தது. தமிழ்மக்கள் உச்சக்கட்ட துன்பங்களை அனுபவிக்கும்போது, அவை ஜேவிபியினருக்கு வலித்திருக்கவில்லை என்பது கசப்பான உண்மையாகும். எனினும் இந்த கசப்பான உண்மையை மறந்துவிட்டு நாங்கள் நேற்று முதல்நாள் ஜேவிபி பாராளுமன்ற உறுப்பினர்களுக்கும் சகோதரர்களுக்கும் எதிராக யாழ்பாணத்தில் நடத்தப்பட்ட தாக்குதல்களை மிக வன்மையாக கண்டிக்கின்றோம். ஜனநாயக மக்கள் முன்னணியையும், தமிழ்மக்களையும் பொருத்தவரையில் நாம் எல்லாவிதமான வன்முறைகளையும் நிராகரிக்கின்றோம். வன்முறைகள் மூலமாக ஜனநாயகத்தின் குரல்வளை நசுக்கப்படுவதை நாம் ஏற்றுக்கொள்ள முடியாது. ஏனென்றால் வன்முறைகள் மூலமாக மிக அதிகமான துன்பங்களை சமகாலத்திலே அனுபவித்தவர்கள் நாடுமுழுக்க வாழும் தமிழ் மக்களாகும். இந்த வன்முறை சம்பவம் எதிர்காலத்தில் இந்நாட்டில் வாழும் அனைத்து இன மக்களும் அரச பயங்கரவாத நடவடிக்கைகளுக்கு எதிராக அணிதிரள வேண்டும் என்ற அடிப்படை உண்மையை வலியுறுத்தி நிற்கின்றது என்று அவர் மேலும் கூறியுள்ளார்.

குருநாகல் வைத்தியசாலையில் அனுமதிக்கப்பட்டுள்ள குவைத் சென்று பாதிக்கப்பட்ட பணிப்பெண்..!

2010-11-15T17:25:00.002+05:30

மூன்று மாதங்களாகச் சம்பளம் எதும் வழங்காமல் வேலை வாங்கிய வீட்டு உரிமையாளர் ஒருநாள் திடீரெனத் தாக்கி கையில் சிறு கம்பிகளை ஏற்றியதாக குருநாகல் வைத்தியசாலையில் அனுமதிக் கப்பட்டிருக்கும் இலங்கைப் பணிப்பெண் மீனாட்சி லட்சுமி தெரிவித்துள்ளார். மூன்று மாதங்களாக எனக்கு சம்பளம் வழங்கப்படவில்லை. இந்தக் கவலையில் நான் தனியாக அழுது கொண்டிருந்தபோது அங்குவந்த வீட்டு உரிமையாளர் முகத்தில் துணியொன்றைப் போட்டு கீழே வீழ்த்தினார். அதன் பின்னர் அங்கு வந்த அவரின் மனைவி கையில் வைத்திருந்த சிறு கம்பிகளை ஏற்றினார். கதறி அழஅழ கம்பி ஏற்பட்டது எனத் துக்கத்துடன் கூறியுள்ளார் லட்சுமி. கடந்த ஆகஸ்ட் மாதம் 23ம் திகதி இச்சம்பவம் நடைபெற்றதாகக் குறிப்பிட்ட அவர்; அந்த வீட்டிலிருந்து வெளியேறி 3 மாதங்கள் குவைத் வேலை வாய்ப்பு நிலையத்தில் தங்கியிருந்ததாகக் கூறியுள்ளார். அங்கிருந்து வீட்டைத் தொடர்பு கொள்வதற்கு அனுமதி வழங்கப்படவில்லை யென்றும் தெரிவித்தார். பின்னர் நவம்பர் 11ம் திகதி இலங்கை திரும்பி வைத்தியசாலையில் அனுமதிக்கப்பட்ட தாகவும் லட்சுமி கூறினார். இவருடைய இடது கையிலிருந்து 8 சிறிய கம்பிகளும் காலிலிருந்து ஒரு கம்பியும் வெளியேற்றப்பட்டுள்ளன.

ஈ.பி.டி.பியினர் மற்றும் கடற்படையினர் எனது கணவனைக் கடத்திச் சென்றார்கள்-மனைவி சாட்சியமளிப்பு..!

2010-11-15T17:23:00.003+05:30

ஈ.பி.டி.பியினர் மற்றும் கடற்படையினர் எமது நெற்றியில் துப்பாக்கியை வைத்து மிரட்டிவிட்டு எனது கணவனைக் கடத்திச் சென்றார்கள் என கடத்தப்பட்டவரின் மனைவியான ம.மேரிமக்ரெலின் சாட்சிமளித்துள்ளார். கற்றுக்கொண்ட பாடங்கள் மற்றும் நல்லிணக்க ஜனாதிபதி ஆணைக்குழுவின் அமர்வு நேற்று வேலணை மண்கும்பான் பிள்ளையார் கோயில் திருமண மண்டபத்தில் இடம்பெற்றது. அங்கு சாட்சியம் அளித்த மேரி மக்ரெலின் மேலும் கூறியதாவது, 2006ம் ஆண்டு ஒகஸ்ட் 17ம் திகதி இரவு 9.45மணியளவில் வீட்டுக்கு வந்தவர்கள் எனது கணவரை மக்சி என்று பெயர் கூறி அழைத்தார்கள் பின்னர் வீட்டுக் கதவை உடைத்துக்கொண்டு உள்ளே வந்தார்கள். அவர்கள் உள்ளே வந்தபோது வெளியில் சிலர் தமிழில் உரையாடிக் கொண்டிருப்பது எனக்குக் கேட்டது. உள்ளே வந்தவர்கள் நெற்றியில் துவக்கை வைத்து மிரட்டி எங்களை அறைக்குள் பூட்டி வைத்து விட்டார்கள். அதன் பின்பு எனது கணவனை கடத்திச் சென்றார்கள். வெளியில் நின்ற எனது அக்கா தடுத்தபோது தள்ளிவிட்டுச் சென்றார்கள். கடத்திச் சென்றவர்களின் முகங்கள் எனக்கு நன்றாகத் தெரியும் என்று கூறியுள்ளார். அதன் பின்னர் சாட்சியமளித்த பெண்மணி: யாழ்ப்பாணம் இந்துக் கல்லூரியில் படித்துக்கொண்டிருந்த எனது மகனை (அனுராஜ்) 2007 ஒக்ரோபர் மாதம் 2ம் திகதி வீட்டில் வந்து வெள்ளைவானில் கடத்திச் சென்றார்கள். பின்னர் குறிப்பிட்ட தொகை பணம் செலுத்தப்பட்ட பின்னர் அவரை எனக்குக் காட்டினார்கள். அவர் வயாவிளான் இராணுவ முகாமில் இருப்பதாக கண்டவர்கள் சொன்னார்கள். எனது மகன் என்னிடம் கதைக்கும்போது நான் நிச்சயமாக வருவேன் நீங்கள் ஒன்றும் செய்யவேண்டாம் என்று சொன்னான். எனது மகனை என்னிடம் மீட்டுத் தாருங்கள் என்று ஆணைக்குழுவினரிடம் கண்ணீர்மல்க வேண்டினார். தொடர்ந்து மண்டைதீவு, 4 ஆம் வட்டாரத்தைச் சேர்ந்த பி.திரவியராஜா சாட்சியமளிக்கையில் 90ம் ஆண்டளவில் இடம்பெயர்ந்து அல்லைப்பிட்டி தேவாலயத்தில் தஞ்சமடைந்திருந்தபோது எனது மகன் இராணுவத்தினரால் கொண்டு செல்லப்பட்டார். இன்றுவரை எங்கே இருக்கிறார் என்று தெரியாது. தேவாலயத்துக்கு வந்த இராணுவத்தினர் 40 வயதுக்குட்பட்ட அனைவரையும் வருமாறு கூறவே எனது மகன் சென்றார். அப்போது எனது மகனுடன் சேர்ந்து 20பேர் வரை இராணுவத்தினரால் கொண்டு செல்லப்பட்டனர் என்று தெரிவித்துள்ளார்.

யாழ்ப்பாணத்தில் வைத்து ஜே.வி.பியினர்மீது தாக்குதல்..!

2010-11-15T17:19:00.002+05:30

யாழ்ப்பாணத்தில் வைத்து மக்கள் விடுதலை முன்னணியின் நாடாளுமன்ற உறுப்பினர் சுனில் ஹந்துன்நெத்திமீது தாக்குதல் நடத்தப்பட்டுள்ளது. யாழ்ப்பாணத்தில் நடைபெற்ற கூட்டமொன்றின்போதே இத்தாக்குதல் மேற்கொள்ளப்பட்டுள்ளதாக தெரிவிக்கப்படுகின்றது. இத்தாக்குதலில் ஹந்துன்நெத்தி உட்பட மக்கள் விடுதலை முன்னணியின் கட்சி ஆதரவாளர்களும் காயமடைந்துள்ளனர்.

ஜனாதிபதியின் பதவியேற்பு நிகழ்வினையொட்டி 1000 கண்ணாடிகள் வழங்கும் நிகழ்வு..!

2010-11-15T17:17:00.001+05:30

ஜனாதிபதி மஹிந்த ராஜபக்ஷவின் இரண்டாவது பதவியேற்பு நிகழ்வினையொட்டி ஆயிரம் மூக்குக் கண்ணாடிகள் வழங்கும் நிகழ்வு மானிப்பாய் இந்துக் கல்லூரியில் நேற்று இடம்பெற்றபோது அதில் சிறப்பு விருந்தினராகக் கலந்து கொண்டு திரும்புகையில் நாவற்குழி சிங்களக் குடியேற்றம் குறித்து ஊடகத்தினர் கேட்டபோதே அவர் மேற்கண்டவாறு தெரிவித்துள்ளார். யாழ்.மாவட்டத்தில் கடந்த 1985 ஆம் ஆண்டுகளில் வாடகை வீடுகளில் வாழ்ந்த சிங்கள மக்கள் தங்களைக் குடியேற்று மாறுகோரி யாழ்.ரயில் நிலையத்தில் தங்கியிருந்தனர். இந்த மக்களை நானும் அமைச்சர் டக்ளஸ் தேவானந்தாவும் சந்தித்து அவர்களின் ஆவணங்களைப் பரிசீலனை செய்து உரிய நடவடிக்கைகளை மேற்கொள்வதற்கு மூன்றுமாத கால அவகாசம் கேட்டிருந்தோம். ஆனால், அதுவரை பொறுத்திராது அந்த மக்கள் தாமாகவே அதில் மீள்குடியேறியுள்ளனர். அவர்கள் தேசிய வீடமைப்பு அதிகார சபைக்குச் சொந்தமான காணிக்குள் குடியேறியுள்ளதால் அவர்களை அங்கிருந்து அகற்றுவது குறித்து நடவடிக்கைகளை வீடமைப்பு அமைச்சுதான் மேற்கொள்ள வேண்டும். நாவற்குழியில் உள்ள அரச காணிகளில் காணியில்லாத தமிழ் மக்கள் குடியேறலாமா? என்று ஊடகவியலாளர் கேட்டதற்கு, தமிழ் மக்களும் அங்கு குடியேற விரும்பினால் தாராளமாகக் குடியேறலாம். அதற்கு யாரும் தடை விதிக்கப்போவதில்லை. இனங்களுக்கிடையில் பிளவினை ஏற்படுத்தி மீண்டும் ஒரு யுத்தத்தினை எதிர்கொள்ள இலங்கை தயாராகவில்லை என்றும் அவர் கூறியுள்ளார்.

நாவற்குழியில் சிங்கள மக்கள் குடியேற்றம்..!

2010-11-15T17:14:00.002+05:30

யாழ்ப்பாணம், நாவற்குழியில் குடியேறியுள்ள சிங்கள மக்களுக்கு காணி உறுதியிருப்பது உறுதிப்படுத்தப்படுமானால் 24 மணித்தியாலத்துக்குள் அவர்கள் குடியேற்றப்படுவார்கள். நாவற்குழியில் தங்கியுள்ள சிங்கள மக்களை அங்கிருந்து வெளியேற்றுவது குறித்து தேசிய வீடமைப்பு அதிகார சபையினர்தான் சட்ட நடவடிக்கையினை மேற்கொள்ள வேண்டும் என்று மீள்குடியேற்ற அமைச்சர் மில்றோய் பெர்னாண்டோ தெரிவித்துள்ளார்.

இறுதி யுத்தத்தில் காணமல் போனவர்களை கண்டுபிடித்து தருவதாக கூறி பணம் மோசடியில் ஈடுபட்டவர்கள் கைது..!

2010-11-15T17:12:00.001+05:30

இறுதி யுத்தத்தின்போது காணமல் போனவர்களை கண்டுபிடித்து தருவதாக கூறி பணம் மோசடியில் ஈடுபட்ட சிலரை கிளிநொச்சியில் வைத்து பொலிஸார் கைதுசெய்துள்ளனர். ஒரு வாரகாலமாக இந்நடவடிக்கையில் ஈடுபட்டு வந்தவர்களை பொலிஸாருக்கு கிடைத்த விசேட தகவல் அடிப்படையில் கைது செய்துள்ளனர். எனினும் இது வரைக்கு சம்பவத்துடன் தொடர்புடைய மூவர் கைது செய்யப்பட்டுள்ளதாக பொலிஸார் தெரிவித்துள்ளனர்.

சிறுபான்மை அரசியலை அழிக்கும் செயற்பாடே உள்ளுராட்சி தேர்தல் சட்ட திருத்தமாகும்-முஸ்லீம் இடதுசாரி முன்னணி..!

2010-11-15T17:11:00.002+05:30

சிறுபான்மை அரசியலை அழிக்கும் செயற்பாடே உள்ளுராட்சி தேர்தல் சட்ட திருத்தமாகும். இதற்கு துணைபோகின்ற சகல சிறுபான்மை அரசியல்வாதிகளும் மிகப்பெரிய வரலாற்றுத் துரோகத்தை இழைக்கின்றனர் என்று முஸ்ஸீம் இடதுசாரி முன்னணியின் பொதுச்செயலர் ஆ.சு.ஆ.பைசால் 11.11.2010அன்று வெளியிட்டுள்ள அறிக்கையில் தெரிவித்துள்ளார். அரசாங்கம் சிறுபான்மை கட்சிகளை அழிக்க சதித்திட்டம் தீட்டியிருக்கிறது. இச்சதியை முறியடிப்பதற்காக சிறுபான்மை முஸ்ஸீம், தமிழ் கட்சிகள் ஒருமித்து உள்ளுராட்சி; தேர்தல்முறை திருத்தச் சட்டமூலத்தை நிராகரிக்க வேண்டும். இரண்டு பேரினவாதக் கட்சிகள் தவிர்ந்த சகல சிறுபான்மைக் கட்சிகள் சிறுகட்சிகள் சகலதையும் ஜனநாயக அரசியல் நீரோட்டத்திலிருந்து ஓரங்கட்ட எடுத்துக் கொள்ளப்படும் மிகவும் பாரதூரமான இந்த வரலாற்று சதிமுயற்சி குறித்து சிறுபான்மையின மக்கள், புத்திஜீவிகள் விழிப்பாக இருக்கவேண்டும். தேர்தலில் போட்டியிட நியமனப்பத்திரம் தாக்கல் செய்யும்போது ஒருகட்சி அல்லது சுயேச்சைக்குழு ஒவ்வொரு வட்டாரத்துக்கும் தனித்தனியாக தாக்கல் செய்யமுடியாது. 14 வட்டாரத்துக்கும் மேலதிகமான நான்கு அபேட்சகர்களின் நியமனப் பத்திரத்தையும் தாக்கல் செய்யவேண்டும். கட்சி சார்பாக போட்டியிடும் ஒரு அபேட்சகருக்கு ரூபா 5000 வீதமும் சுயேச்சைக்குழு அபேட்சகர் ஒருவர் ரூபா 20,000 வீதமும் கட்டுப்பணம் செலுத்தவேண்டும். தொடர்ந்து இடம்பெறவுள்ள உள்ளுராட்சி அதிகார சபைகள் மற்றும் நிர்வாக எல்லை மீள்நிர்ணயம் செய்யப்படுவதற்கான ஏற்பாடுகளும் அவசரஅவசரமாக நடந்து கொண்டிருக்கின்றது. இதனூடாக சிறுபான்மையினர் நலன் பாதிக்கப்படுகின்ற அபாயகரமான ஒரு சூழ்நிலையில் எரியும் நெருப்பில் எண்ணெய் வார்க்கும் பேரின அரசியல் சதி அரங்கேறுகின்றது என்றும் அவர் அந்த அறிக்கையில் மேலும் சுட்டிக்காட்டியுள்ளார்.

முல்லைத்தீவில் 50கோடிரூபா செலவில் உள்ளுராட்சி மற்றும் உட்கட்டமைப்பு தொடர்பான அபிவிருத்திப் பணிகள்..!

2010-11-15T17:09:00.001+05:30

முல்லைத்தீவு மாவட்டத்தில் ஐம்பது கோடிரூபா செலவில் உள்ளுராட்சி மற்றும் உட்கட்டமைப்பு தொடர்பான பல்வேறு பாரிய அபிவிருத்திப் பணிகள் முன்னெடுக்கப்பட்டு வருவதாக வடமாகாண ஆளுநர் மேஜர்ஜெனரல் ஜீ.ஏ. சந்திரசிறி தெரிவித்துள்ளார். யுத்தத்தின்போது கடுமையாக பாதிக்கப்பட்ட முல்லைத்தீவு மாவட்டத்தில் வெகுவிரைவில் முழுமையான சிவில் நிர்வாகத்தை ஏற்படுத்தும் பொருட்டும், மக்களுக்குத் தேவையான சகல வசதிகளையும் பெற்றுக் கொடுக்கும் வகையிலும் இந்த நடவடிக்கை எடுக்கப்பட்டுள்ளதாக அவர் மேலும் தெரிவித்துள்ளார். முல்லைத்தீவு மாவட்டத்திலுள்ள 115 உள்ளுர் வீதிகளை புனரமைக்கும் திட்டத்திற்கு 393 மில்லியன் ரூபாவும், பிரதேச சபைகளை நிர்மாணிப்பதற்கான ஒன்பது கட்டுமான பணிகளுக்கு 71 மில்லியன் ரூபாவும், ஏனைய நிர்மாண பணிகளுக்கு 36 மில்லியன் ரூபாவும் ஒதுக்கீடு செய்துள் ளதாக முல்லைத்தீவு மாவட்டத்திற்கான பிராந்திய உள்ளூராட்சி உதவி ஆணையாளர் கே.உதயராஜா தெரிவித்துள்ளார். வடக்கின் வசந்தம், வட மாகாணத்துக்கான அவசர புனரமைப்பு திட்டம் ஆகியவற்றின் ஊடாக வட மாகாண சபை இந்த அபிவிருத்தித் திட்டங்களை முன்னெடுத்து வருவதாக அவர் மேலும் தெரிவித்துள்ளார். இத்திட்டத்தின்கீழ் முல்லைத்தீவு மாவட்டத்திலுள்ள 115 உள்ளூர் வீதிகள் முழுமையாக புனரமைக்கப்பட வுள்ளதுடன் புதுக்குடியிருப்பு, துணுக்காய், கரைத்துறைப்பற்றும் மற்றும் பாண்டியன் குளம் ஆகிய நான்கு பிரதேச சபைகளுக்கான அலுவலகங்களும், செம்மாலை கொக்கிளாய் பிரதேசத்திற்கான உப பிரதேச சபை அலுவலகங்களும் புதிதாக நிர்மாணிக்கப்படவுள்ளன. துணுக்காய் பிரதேச சபைக்கு 2 கோடி 80 இலட்சம் ரூபாவும், கரைத்துறைப்பற்று பிரதேச சபைக்கு ஒரு கோடி 80 இலட்சம் ரூபாவும், மாந்தை கிழக்கு பிரதேச சபைக்கு ஒரு கோடி 20 இலட்சம் ரூபாவும் ஒதுக்கீடு செய்யப்பட்டுள்ளன. 11 மில்லியன் ரூபா செலவில் துணுக்காய் பிரதேச சபை அலுவலகமும், 16 மில்லியன் ரூபா செலவில் துணுக்காய் பஸ் தரிப்பு நிலையம் மற்றும் கடைத்தொகுதியும் நிர்மாணிக்கப்படவுள்ளன. மாந்தை கிழக்கில் 5.5 மில்லியன் ரூபா செலவில் பாண்டியன் குளம் பிரதேசசபை அலுவலகமும், 6.5 மில்லியன் ரூபா செலவில் பொன்னகர் கிராமிய சந்தையும் நிர்மாணிக்கப்பட்டு வருகின்றன. கரைத்துறைப்பற்று (மரிடைன்பற்று)பகுதியில் 14 மில்லியன் ரூபா செலவில் கரைத்துறைப்பற்று பிரதேச சபை அலுவலகமும், 2 மில்லியன் ரூபா செலவில் செம்மாலை பிரதேசசபை உப அலுவலகமும் 2 மில்லியன் ரூபா செலவில் கொக்கிளாய் பிரதேச சபை உப அலுவலகமும் நிர்மாணிக்கப்படவுள்ளன. புதுக்குடியிருப்பில் ஆறு மில்லியன் ரூபாசெலவில் ஒட்டுச் சுட்டானில் புதுக்குடியிருப்பு பிரதேச சபை உப அலுவலகமும், முத்தையன் கட்டுசந்தையும் நிர்மாணிக்கப்பட்டு வருகின்றன. இத்திட்டத்தின் ஊடாக முல்லைத்தீவு மாவட்டத்திலுள்ள மக்கள் பெரிதும் நன்மையடையவுள்ளதாக முல்லைத்தீவு மாவட்டத்திற்கான பிராந்திய உள்ளூராட்சி உதவி ஆணையாளர் கே.உதயராஜா மேலும் தெரிவித்துள்ளார். இந்த மாவட்டத்தின் உள்ளூராட்சி மேம்பாட்டுத்திட்டங்களை துரித கதியில் முன்னெடுக்கத் தேவையான சகல நடவடிக்கைகளும் மேற்கொள்ளப்பட்டுள்ளதாகவும் அவர் குறிப்பிட்டுள்ளார்.

ஜனாதிபதி மஹிந்த ராஜபக்ஷவின் பிறந்த தினத்தையொட்டிய நிகழ்வுகள்..!

2010-11-14T16:00:00.002+05:30

ஜனாதிபதி மஹிந்த ராஜபக்ஷவின் பிறந்த தினத்தையொட்டியும், இரண்டாவது பதவியேற்பு வைபவத்தை முன்னிட்டும் நாடுமுழுவதும் தேசிய நிகழ்வுகள் ஏற்பாடு செய்யப்பட்டுள்ளன. நாளை 15ம் திகதி தேசத்துக்கு நிழல்தரும் 11லட்சம் மரக்கன்றுகள் நாட்டப்படுகின்றன. காலை 10:07 முதல் 10:18 வரை யிலான 11 நிமிடங்களுக்குள்ளான சுபவேளையில் இந்தக் கன்றுகள் நாட்டப்படும். மத வழிபாட்டுத் தலங்களிலும் ஜனாதிபதி செயலகம் முதல் சகல அரச நிறுவனங்கள், பாடசாலைகள், தனியார் நிறுவனங்கள் ஆகியன மரக்கன்று நடும் நிகழ்வில் பங்கேற்கின்றன. தவிரவும் சகல வீட்டுத் தோட்டங்களிலும் மரக்கன்றொன்றை நடுவதற்கும் நடவடிக்கை எடுக்கப்பட்டுள்ளது. தேசத்திற்கு நிழல்தரும் மரம் நடுகை திட்டத்தின்கீழ் நாட்டப்படும் கன்றுகளைப் பராமரிப்பதற்கான திட்டமொன்றும் தொடர்ச்சியாக முன்னெடுக்கப்படவுள்ளது. நாட்டுக்கு மதிப்பைத் தேடித்தந்த உண்மையான தேசிய தலைவரான ஜனாதிபதி மஹிந்த ராஜபக்ஷவுக்குச் செலுத்தும் மரியாதையாக மரக்கன்று நாட்டும் திட்டம் மேற் கொள்ளப்படுவதாக சுற்றாடல்துறை அமைச்சர் அனுர பிரியதர்ஷன யாப்பா தெரிவித்துள்ளார்.

யாழ்ப்பாணம், முல்லைத்தீவு பிரதான பாதைகள் 302 மில்லியன் அமெரிக்க டொலர்செலவில் புனரமைப்பு..!

2010-11-14T15:57:00.002+05:30

வடக்கு அபிவிருத்தித் திட்டத்தின்கீழ் யாழ்ப்பாணம், முல்லைத்தீவு மாவட்டங்களில் வீதி அபிவிருத்தி அதிகாரசபைக்குச் சொந்தமான பிரதான பாதைகள் 302 மில்லியன் அமெரிக்க டொலர்செலவில் புனரமைக்கப்படவுள்ளன. முல்லைத்தீவு மாவட்டத்தில் நான்கு பிரதான பாதைகளும், யாழ். மாவட்டத்தில் நான்கு பிரதான பாதைகளும் இலங்கை நாணயப்படி 30,000 மில்லியன் ரூபா செலவில் சீன அரசின் உதவியுடன் புனரமைப்பு செய்யப்படவுள்ளன. பொருளாதார அபிவிருத்தி அமைச்சரும் வடக்கு அபிவிருத்தி, மீள்குடியேற்றத்துக்கான ஜனாதிபதி செயலணியின் தலைவருமான பசில் ராஜபக்ஷ வீதி புன ரமைப்பு வேலைகளை நேற்று ஆரம்பித்து வைத்துள்ளார். நேற்றுக்காலை முல்லைத்தீவு - மாங்குளம் பாதை, புனரமைப்பு வேலைக்களுக்கான அடிக்கல்லை நட்டு வைத்துள்ளார். நேற்றுப்பகல் ஒட்டுச்சுட்டான் நெடுங்கேணி பாதைக்கான அடிக்கல் நிகழ்வும் நடைபெற்றது. மாலை கிளிநொச்சி கனகராயன்குளத்தில் யாழ். -வவுனியா ஏ-9 பாதைக்கான வேலைகள் ஆரம்பிக்கப்படுவதற்கான அடிக்கல் நடும் நிகழ்வும் இடம்பெற்றது. முல்லைத்தீவு - மாங்குளம் வீதி, முல்லைத்தீவு - புல்மோட்டை ஊடான கொக்கிளாய் வீதி, முல்லைத்தீவு - நெடுங்கேணி ஊடான புளியங்குளம் வீதி போன்ற பிரதான வீதிகள் கார்பட் போடப்பட்டு புனரமைப்பு செய்யப்படவுள்ளன. வீதி அபிவிருத்தி வேலைகளை சீன ரெயில்வே பொறியியல் மும்பெளி லிமிட், சீன ஏறோ ரெக்னோலஜி இன்ரநஷனல் என்ஜினியரிங் ஓப்பரேஷன், சிரோ ஹைட்ரோ கோப்பரேஷன் ஆகிய மூன்று நிறுவனங்கள் நிறைவேற்றவுள்ளன. இத்திட்டத்தை செயல்படுத்த சீன அரசாங்கமும் ஆசிய அபிவிருத்தி வங்கியும் முன்வந்துள்ளன. வட பகுதியின் வரலாற்றில் ஆகக் கூடிய நிதி வீதி அபிவிருத்திக்கு முதல் முறையாக அமுல் செய்யப்படவுள்ளது. இவ்வேலைகள் 30 மாதங்களில் பூர்த்தியாகுமென திட்டப் பணிகளுக்கு பொறுப்பான யாழ். மாவட்ட வீதி அபிவிருத்தி அதி கார சபை பிரதம பொறியியலாளர் வி. சுதாகர் தெரிவித்துள்ளார். இத்திட்டத்தில், யாழ்ப்பாணம் கண்டி வீதியில் 253 கிலோமீற்றர் வீதியும், யாழ்ப்பாணம் காங்கேசன்துறை வீதியில் 83 கிலோமீற்றர் வீதியும், யாழ்ப்பாணம் பலாலியில் 60 கிலோமீற்றர் வீதியும், யாழ்ப்பாணம் பருத்தித்துறை வீதியில் புத்தூர் சந்தி வரையான 30 கிலோமீற்றர் வீதியும், புத்தூர் மீசாலை இருபது கிலோமீற்றர் வீதியும் முப்பத்திமூன்றடிக்கு அகலமாக்கப்பட்டு காப்பற் வீதியாக மாற்றப்படவுள்ளன. வீதிகளை அகலமாக்கும் எல்லைகளை வீதி அபிவிருத்திச்சபை நடுகைக்கற்கள் மூலம் அடையாளப்படுதியுள்ளது. இதேவேளையில், பிராந் திய வீதிகளான மானிப்பாய் - காரைநகர் வீதி, சுண்டுக்குளி, கொழும்புத்துறை வீதி, கச்சேரி கடற்கரை துறைமுகவீதி, நல்லூர் ஓட்டுமடம்வீதி, யாழ். பொன்னாலை பருத்தித்துறைவீதி, யாழ் பண்ணை ஊர்காவற்றுறை வீதி, சங்கிலித்தோப்பு, செம்மணி வீதி, நாவாந்துறை ஓட்டுமடம் வீதி என்பனவும் அபிவிருத்தி செய்யப் படவுள்ளன. 18 கிலோ மீற்றர் நீளமான வீதிகள் உள்ளூர் ஒப்பந்தக்காரர்களிடம் ஒப்படைக்கப்பட்டுள்ளது. வீதி அபிவிருத்தி வேலைகள் ஜனாதிபதி மஹிந்த ராஜபக்ஷவின் வழிகாட்டலின் அமைச்சின் செயலா ளர் அட்மிரல் வசந்த கரன்னாகொட, நெடுஞ் சாலை அமைச்சின் பணிப்பாளர்நாயகம் ஆர்.டபிள்யு.ஆர். பிரேமசிறி, மேலதிகப் பணிப்பாளர் டபிள்யூ. எஸ். வீரசிங்க ஆகியோரின் வழிநடத்தலில் ஆரம்பமாகியுள்ளது.

வீட்டு முகவரிக்கே தேசிய அடையாள அட்டைகளை அனுப்பிவைக்க நடவடிக்கை..!

2010-11-14T15:55:00.001+05:30

ஜனவரி முதலாம் திகதிமுதல் வீட்டு முகவரிக்கே தேசிய அடையாள அட்டைகளை அனுப்பிவைக்க நடவடிக்கை எடுக்கப்படும் என ஆட்பதிவுத் திணைக்கள ஆணையாளர் நாயகம் ஜகத் பீ விஜேவீர தெரிவித்துள்ளார். இதுவரை காலமும் பிரதேச செயலகத்துக்கு அனுப்பி வைக்கப்பட்டு, அங்கிருந்து கிராம உத்தியோகத்தர் ஊடாகவே தேசிய அடையாள அட்டை உரியவருக்கு விநியோகிக்கப்பட்டு வந்தது. இதில் ஏற்படும் தாமதத்தை தவிர்க்கும் வகையிலேயே இந்த புதிய முறை மேற்கொள்ளப்படவுள்ளது. எதிர்காலத்தில் தேசிய அடையாள அட்டை பெற்றுக்கொள்ள விண்ணப்பிப்போர் விண்ணப்பத்துடன் முகவரியிட்டு முத்திரை ஒட்டிய தபாலுறையை இணைத்து அனுப்புமாறு கேட்கப்பட்டுள்ளனர். க.பொ.த. சாதாரண தரப் பரீட்சைக்குத் தோற்றவிருக்கும் மாணவர்களுக்கான தேசிய அடையாள அட்டை இம்மாத முடிவுக்குள் பெற்றுக் கொடுக்கப்படும் என ஆட்பதிவுத் திணைக்களம் அறிவித்துள்ளது.

மலையகப் பெருந்தோட்டங்களில் இந்தியாவின் உதவியுடன் வீடுகளை நிர்மாணிக்க ஏற்பாடு..!

2010-11-14T15:28:00.003+05:30

மலையகப் பெருந்தோட்டங்களில் இந்தியாவின் உதவியுடன் வீடுகளை நிர்மாணிப்பதற்கான பூர்வாங்க ஏற்பாடுகள் மேற்கொள்ளப்பட்டு வருவதாக இலங்கை தொழிலாளர் காங்கிரஸின் தலைவர்- பொருளாதார பிரதியமைச்சர் முத்துசிவலிங்கம் தெரிவித்துள்ளார். ஐயாயிரம் வீடுகளை நிர்மாணித்துக் கொடுப்பதற்கு இந்தியா முன்வந்துள்ள நிலையில் முதற்கட்டமாக ஆயிரம் வீடுகளை நிர்மாணித்துக் கொடுப்பதற்கான பணிகள் விரைவில் ஆரம்பிக்கப்படுமென்று கூறிய பிரதியமைச்சர், கொத்தணி முறையில் இந்த வீடுகள் அமைக்கப்படவுள்ளதாகத் தெரிவித்துள்ளார். முதற்கட்டமாக நுவரெலியா, பதுளை மாவட்டங்களில் வீடுகள் நிர்மாணிக்கப்படவுள்ளன. வீடுகளுக்கான பயனாளிகளைத் தெரிவுசெய்து பட்டியல்களும் தயாரிக்கப் பட்டுள்ளன. குறிப்பிட்ட தோட்டங்களின் மேற்பார்வையாளர்கள் ஊடாகப் பயனாளிகள் தெரிவுசெய்யப்பட்டுள்ளதாகக் கூறிய பிரதியமைச்சர், பயனாளிகளின் பெயர்ப்பட்டியல் உள்ளிட்ட விபரங்களை காங்கிரஸின் செயலாளர் நாயகம்- அமைச்சர் ஆறுமுகன் தொண்டமான் கொழும்பில் உள்ள இந்திய உயர்ஸ்தானிகரிடம் கையளிப்பாரென குறிப்பிட்டுள்ளார். மலையகப் பெருந்தோட்டத் தொழிலாள சமூகத்தின் வீட்டுப் பிரச்சினையைத் தீர்ப்பதற்கு அவர்களுக்குத் தனித்தனி வீடுகளை அமைத்துக் கொடுப்பதற்கு இந்தியா முன்வந்துள்ளது. முதலில் ஐயாயிரம் வீடுகளை நிர்மாணித்துக் கொடுக்க இணக்கமாகியுள்ளது. இதன்படி, முதற்கட்டமாக கொத்தணி முறையில் ஆயிரம் வீடுகளை நிர்மாணிக்க நடவடிக்கை எடுக்கப்படுகிறது. மலையத்கதில் லயன் குடியிருப்புகளை இல்லாமற் செய்து தனித் தனி வீடுகளைக் கொண்ட கிராமங்களை உருவாக்குவதற்கு 3 இலட்சத்து 25 ஆயிரம் வீடுகளை நிர்மாணிக்க வேண்டும் என்று குறிப்பிட்ட பிரதியமைச்சர் சிவலிங்கம், இலங்கை இந்திய அரசுகளின் உதவியுடன் இந்தத் திட்டத்தை நிறைவேற்றிவிட முடியுமென்று நம்பிக்கை தெரிவித்துள்ளார்.

ஆசிய விளையாட்டு விழா சீனாவில் ஆரம்பம்..!

2010-11-13T21:23:00.002+05:30

ஆசிய விளையாட்டு விழா நேற்று மிகவும் கோலாகலமாக சீனாவில் ஆரம்பமாகியுள்ளது. மிகவும் எதிர்பார்க்கப்படும் ஆசிய விளையாட்டு போட்டியின் துவக்கவிழா மிதக்கும் படகுகளின்மீது மிகவும் வித்தியாசமான முறையில் நடக்கவுள்ளது. சீனாவிலுள்ள குவாங்சு நகரில் 16ஆவது ஆசிய விளையாட்டு போட்டி நடக்கவுள்ளது. நேற்று துவங்கும் போட்டிகள் வரும் 27ம்திகதி நிறைவுபெறுகிறது. நேற்று துவக்க விழாவூக்கு சீனா மிகப் பிரம்மாண்ட ஏற்பாடுகளை செய்துள்ளது. வழக்கமாக மைதானங்களில் தான் துவக்கவிழா நடக்கும். இம்முறை சற்று வித்தியாசமாக குவாங்சுவில் உள்ள பேர்ல் நதியில் மிதக்கும் படகுகளின்மீது துவக்கவிழா கலை நிகழ்ச்சிகள் நடக்கவுள்ளன. சுமார் 2400 கி.மீ. நீளம் கொண்ட பேர்ல் நதியில் அலங்கரிக்கப்பட்ட 46 படகுகள் மிதந்து செல்லும். இவற்றில் 45 நாடுகளை சேர்ந்த 10 ஆயிரத்துக்கும் மேற்பட்ட வீர வீராங்கனைகள் பயணிக்க உள்ளனர். 6ஆயிரம் கலைஞர்கள் சேர்ந்து பல்வேறு கலைநிகழ்ச்சிகளை நடத்திக் காட்ட இருக்கின்றனர். கண்கவர் "லேசர் ஷோ' மற்றும் வாணவேடிக்கை ரசிகர்களை கவர்ந்திழுக்க காத்திருக்கிறது. இதற்காக நகர் முழுவதும் விளக்குகள் அணைக்கப்பட உள்ளன. சீன பாரம்பரியத்தை விளக்கும் நிகழ்ச்சிகள் ஒளி வெள்ளத்தில் தண்ணீரின்மீது பிரதிபலிக்க உள்ளன. சுமார் 45நிமிட பயணத்துக்கு பின் படகுகள் அனைத்தும் 6 பாலங்களை கடந்து ஹெய்க்சின்ஹா சதுக்கத்தை சென்றடையும். ஆசிய விளையாட்டு ஜோதி ஏற்றும் நிகழ்ச்சியும் வித்தியாசமாக நடக்க உள்ளது. இதன் விபரங்கள் மிகவும் ரகசியமாக வைக்கப்பட்டுள்ளன.

சிறீலங்கா முஸ்லிம் காங்கிரஸ் அரசாங்கத்துடன் முழுமையாக இணைந்து செயற்படவுள்ளது..!

2010-11-13T21:21:00.001+05:30

சிறீலங்கா முஸ்லிம் காங்கிரஸ் அரசாங்கத்துடன் முழுமையாக இணைந்து செயற்படவுள்ளதாக அக்கட்சியின் தவிசாளர் பாராளுமன்ற உறுப்பினர் பiர் சேகுதாவூத் தெரிவித்துள்ளார். ஜனாதிபதி மஹிந்த ராஜபக்ஷவின் அழைப்பை ஏற்று நடத்தப்பட்ட பேச்சுவார்த்தையினையடுத்து அரசாங்கத்துடன் இணைந்து செயற்படுவதற்கு எடுத்த தீர்மானத்தினை கட்சியின் அதியுயர்பீடம் அங்கீகரித்துள்ளதாகவும் அவர் தெரிவித்துள்ளார். கடந்த 10ம் திகதி ஜனாதிபதியுடன் கட்சியின் தலைவர் றவூப் ஹக்கீம் தலைமையில் இது தொடர்பான பேச்சுவார்த்தை இடம் பெற்றது. இதையடுத்து 11ம் திகதி கட்சியின் அதியுயர் பீடம் கூடியது. இதன்போது இவ்விடயம் விரிவாக ஆராயப்பட்டது. எதிர்வரும் 16ம் திகதி பாராளுமன்றத்தில் தலைவர் றவூப் ஹக்கீம் தனது உரையின்போது இதனை அறிவிக்கவுள்ளார் என்று கூறியுள்ளார்.

ஜனாதிபதியின் இரண்டாவது பதவியேற்பை முன்னிட்டு மட்டக்களப்பு செங்கலடியில் வன பூங்கா ஒன்று அமைக்க ஏற்பாடு..!

2010-11-13T21:19:00.001+05:30

ஜனாதிபதி மஹிந்த ராஜபக்ஷவின் இரண்டாவது பதவியேற்பை முன்னிட்டு மட்டக்களப்பு செங்கலடியில் வன பூங்கா ஒன்று அமைக்கப்படவுள்ளது. மட்டக்களப்பு மாவட்டத்தின் செங்கலடி பிரதேச செயலாளர் பிரிவிலுள்ள கொடுவாமடு பிரதேசத்தில் குறிப்பிடப்பட்ட வன பூங்காவை அமைக்க திட்டமிட்டுள்ளதாக மட்டக்களப்பு மாவட்ட அரசாங்க அதிபர் சுந்தரம் அருமைநாயகம் தெரிவித்துள்ளார். ஜனாதிபதியின் இரண்டாவது பதவியேற்பை முன்னிட்டு நாடளாவிய ரீதியில் மரம் நடுகை இடம்பெறவூள்ள வேளையில் இந்த வன பூங்காவை அமைக்க நடவடிக்கை எடுக்கப்பட்டு வருகின்றமை குறிப்பிடத்தக்கது.

கண்டி, பேராதனை பல்கலைக்கழக மாணவர்கள் நால்வருக்கும் பிணை..!

2010-11-13T21:15:00.002+05:30

கண்டி, பேராதனை பல்கலைக்கழக மாணவர்கள் நால்வருக்கும் நேற்றையதினம் பிணை வழங்கப்பட்டுள்ளது. உயர்கல்வி அமைச்சர் எஸ்.பி.திசாநாயக பல்கலைக்கழகத்திற்கு சமுகமளித்தபோது கூச்சலிட்டு அவமரிiயாதை செய்த சம்பவம் தொடர்பாகக் கைதுசெய்யப்பட்ட நால்வருக்கும் தலா 25000 ரூபா ரொக்கப்பிணையிலும் பெற்றோர்கள்; செய்துகொண்ட ஒரு உடன்படிக்கையின்படியும் பிணையில்செல்ல கண்டி பிரதான மஜிஸ்திரேட் லலித் ஏக்கநாயக்க நேற்று உத்தரவிட்டுள்ளார். மேற்படி மாணர்களின் மேன்முறையீடு தொடர்பாக கடந்த திங்கட்கிழமை கண்டி மேல்நீதிமன்ற நீதிபதி பிரீத்தி மத்மன் சூரசேன இது தொடர்பாக அனுமதி வழங்கியிருந்தமை குறிப்பிடத்தக்கது.

லசந்த விக்ரமதுங்கவின் கையடக்கத் தொலைபேசியை திருடிய நபருக்கு நீதிமன்றம் தண்டனை..!

2010-11-13T21:14:00.002+05:30

சண்டே லீடர் பத்திரிகையின் ஸ்தாபக ஆசிரியர் அமரர் லசந்த விக்ரமதுங்கவின் கையடக்கத் தொலைபேசியை திருடிய நபருக்கு நீதிமன்றம் தண்டனை விதித்துள்ளது. அத்திட்டிய பிரதேசத்தில் வைத்து லசந்த விக்ரமதுங்க படுகொலை செய்யப்பட்டபோது அவரது கையடக்கத் தொலைபேசியை குறித்த நபர் களவாடி, மற்றுமொரு நபருக்கு விற்பனை செய்துள்ளதாக குற்றம் சுமத்தப்பட்டுள்ளது. கையடக்கத் தொலைபேசிய களவாடிய நபருக்கு 06 மாதகால கடூழிய சிறைத்தண்டனையும், 6000 ரூபா அபராதமும் விதிக்கப்பட்டுள்ளது. கல்கிஸ்ஸ நீதிமன்றத்தினால் இத்தண்டனை விதிக்கப்பட்டுள்ளது.

காதலியின் நிர்வாண புகைப்படங்களை பேஸ்புக்கில் பதிவேற்றம் செய்த நபருக்கு விளக்கமறியல்..!

2010-11-13T21:12:00.001+05:30

தனது காதலியின் நிர்வாண புகைப்படங்களை பேஸ்புக்கில் பதிவேற்றம் செய்த நபருக்கு குளியாபிட்டி நீதவான் எதிர்வரும் 26ம் திகதிவரை விளக்கமறியலில் வைக்க உத்தரவிட்டுள்ளார். உயர்தரத்தில் கல்விபயிலும் மாணவி ஒருவரின் நிர்வாணப் படங்களே இவ்வாறு பேஸ்புக் இணையத்தளத்தில் பிரசுரிக்கப்பட்டுள்ளதாக கூறப்படுகின்றது. கொழும்பு சிறுவர் மற்றும் பெண்கள் நடவடிக்கைப் பிரிவினரால் செய்யப்பட்ட முறைப்பாட்டையடுத்தே கிரிவுல்ல பிரதேசத்தைச் சேர்ந்த கசுன் மதுசங்க எனும் இளைஞன் குளியாபிட்டி பொலிசாரால் கைதுசெய்யப்பட்டு நீதிமன்றத்தில் ஆஜர்படுத்தப்பட்டிருந்தார். உயர் தரத்தில் கல்விகற்கும் தனது காதலிக்கும் தனக்கும் ஏற்பட்ட பிரச்சினையடுத்து தான் இச்செயலை செய்ததாக குறித்த நபர் நீதிமன்ற விசாரணைகளின்போது தெரிவித்துள்ளார். குறித்த நபர் தொடர்பான விசாரணைகளை குளியாபிட்டிய பொலிஸாரும், கொழும்பு சிறுவர் மற்றும் மகளிர் அதிகாரசபையும் மேற்கொண்டு வருகின்றனர்.

உடலில் ஊசிகள் ஏற்றப்பட்ட மற்றுமொரு இலங்கைப் பணிப்பெண் நாடு திரும்பினார்..!

2010-11-13T21:10:00.001+05:30

உடலில் ஊசிகள் ஏற்றப்பட்ட மற்றுமொரு இலங்கைப் பணிப்பெண் நாடு திரும்பியுள்ளார். குருநாகல் மாவட்டம் இப்பாகமுவ கொகரல்ல பிரதேசத்தைச் சேர்ந்த 38 வயதான வீரய்யா லெட்சுமி என்ற பெண்ணின்மீது எஜமானர்கள் ஊசிகளை ஏற்றியுள்ளனர். குவைட்டில் வைத்து குறித்த பெண் இவ்வாறு சித்திரவதைக்கு உட்படுத்தப்பட்டுள்ளார். இதேவேளை, குறித்த பெண்ணின் உடலில் காணப்பட்ட ஒன்பது ஊசிகள் சத்திரசிகிச்சை மூலம் நேற்றையதினம் அகற்றப்பட்டுள்ளன. குருணாகல் அரசாங்க வைத்தியசாலையில் சத்திரசிகிச்சை மேற்கொள்ளப்பட்டுள்ளது.

அல் ஜசீரா செய்தி வலையமைப்பின் புதிய ஊழியர்களுக்கான விசா விண்ணப்பத்தை இலங்கை நிராகரித்துள்ளது..!

2010-11-13T21:08:00.001+05:30

அல் ஜசீரா செய்தி வலையமைப்பின் புதிய ஊழியர்களுக்கான விசா விண்ணப்பத்தை இலங்கை அரசாங்கம் காரணம் அறிவிக்காமல் நிராகரித்துள்ளதை வெளிவிவகார அமைச்சு உறுதிசெய்துள்ளது. இலங்கை யுத்தத்தின் இறுதியில் எடுக்கப்பட்டதாக கூறி பலர் சுட்டுக் கொல்லப்படும் காட்சிகளை அல்ஜசீரா தொலைக்காட்சி புதன்கிழமை ஒளிபரப்பியிருந்தது. மேற்படி புகைப்படங்கள் உண்மையானவை அல்லவென இலங்கை அரசாங்கம் தெரிவித்திருந்தது.

வைத்தியர்களின் சம்பளத்தை ஒரு லட்சத்து 80 ஆயிரம் ரூபாவரை அதிகரிக்கக் கோரிக்கை..!

2010-11-12T20:21:00.002+05:30

அரச வைத்தியசாலைகளில் பணியாற்றும் வைத்தியர்களின் சம்பளத்தை ஒரு லட்சத்து 80 ஆயிரம் ரூபாவரை அதிகரிக்குமாறு அரச வைத்தியர்களின் சங்கம் கடந்த 08ம் திகதி அரசிடம் கோரிக்கை விடுத்துள்ளது. கொழும்பில் இடம்பெற்ற ஊடக வியலாளர் சந்திப்பொன்றில் வைத்து மருத்துவ உத்தியோகத்தர் சங்கத்தின் உபதலைவர் டாக்டர் அனுருத்த பாதெனிய இத்தகவலைத் தெரிவித்துள்ளார். அரச மருத்துவர்களின் சம்பளங்கள் அதிகரிக்கப்படாவிடின் அவர்கள் அரச சேவையிலிருந்தும் வெளியேறி தனியார் வைத்தியசாலை களுக்குச் செல்வதைத் தடுத்து நிறுத்த இயலாது போகும் எனவும் அவர் சுட்டிக்காட்டியுள்ளார். தற்போது அரச வைத்திய நிபுணரொருவரின் சம்பளம் 42 ஆயிரத்து 390 ரூபாவாகவும், சாதாரண வைத்தியர்களின் சம்பளம் 26 ஆயிரத்து 160 ரூபாவாகவும் உள்ளதெனவும், இது எந்த விதத்திலும் போதுமானதல்ல எனவும் அவர் தெரிவித்துள்ளார். அத்துடன் தனியார் துறைகளில் உயர் பதவிகளை வகிப்போர் மிகப்பெரும் தொகையில் சம்பளங்க ளைப் பெறுவதாகவும், அரச சேவையில் உயர் பதவிகளை வகிப்போர் விடயத்தில் பெரும் அநீதி இழைக்கப்படுவதாகவும் அவர் தெரிவித்துள்ளார். மேலும் வைத்தியர்களுக்கு அவர்களது சம்பளத்தை விடவும் போக்குவரத்து கொடுப்பனவாக 10 ஆயிரம் ரூபாவும் விபத்துக் கொடுப்பனவொன்றும் வழங்கப்பட்டாலும் அவையும் போதுமான தொகைகள் அல்ல எனவும் அவர் தெரிவித்ததுடன் வைத்தியர்களுக்கு வழங்கப்படும் போக்குவரத்து மற்றும் விபத்துக்கான கொடுப்பனவு 21 ஆயிரம் ரூபாவாக அதிகரிக்கப்படவேண்டும் எனவும் கூறியுள்ளார். 2006, 06இலக்க சம்பளச் சுற்று நிருபத்துக்கு அமைய அரச ஊழியர்களின் குறைந்தபட்ச சம்பளம் 11 ஆயிரத்து 700 ரூபாவாக நிர்ணயிக்கப்பட்டிருந்த போதிலும் அந்தச் சம்பளக் கொள்கைக்கு அமைய அரச ஊழியர்களின் ஆகக்கூடிய மற்றும் கீழ்மட்ட சம்பளத்துக்கு இடையிலான விகிதாசாரம் 1:4 மட்டம் வரையில் கொண்டு வரப்பட்டது. இதற்கு முன்னர் அந்த விகிதாசாரம் 1,12 ஆக இருந்தது புதிய சம்பள விகிதாசாரம் காரணமாக உயர் பதவிவகிப்போருக்கு அநீதி இழைக்கப்பட்டது. ஒரே இரவுக்குள் சம்பளங்கள் அதிகரிக்கப்பட வேண்டுமென நாம் கோரவில்லையெனவும், இது தொடர்பாக திறைசேரி, அரசு, மற்றும் சம்பள ஆணைக்குழு என்ற முத்தரப்பும் கலந்துரையாட வேண்டும் எனவும், சம்பள அதிகரிப்பைப் பெறுவது தொடர்பான தமக்குள்ள தொழிற்சங்க ஆற்றல் இன்று பயன்படுத்தப்படாதிருப்பது குறித்தும் தாம் சுட்டிக்காட்ட வேண்டியுள்ளது எனவும் வைத்தியர் பாதெனிய தெரிவித்துள்ளார்.

புலிகளால் கைவிடப்பட்ட 189 கொள்கலன்கள் வடபகுதியிலிருந்து மீட்பு..!

2010-11-12T20:13:00.002+05:30

புலிகளால் கைவிடப்பட்ட 189 கொள்கலன்கள் வடபகுதியிலிருந்து fமீட்கப்பட்டுள்ளதாக வடமாகாண ஆளுநர் ஜீ.ஏ.சந்திரசிறி தெரிவித்துள்ளார். புலிகளால் கைவிடப்பட்ட 189 கொள்கலன்கள் வட பகுதியிலிருந்து மீட்கப்பட்டுள்ளதாக தெரிவித்த ஆளுநர் சுமார் ஆறரை கோடிரூபா பெறுமதியான இந்த கொள்கலன்கள் வட மாகாணத்திலுள்ள விவசாய அமைப்புக்களுக்கும் கூட்டுறவுச் சங்களுக்கும் கையளிக்கப்படவுள்ளதாகவும் தெரிவித்துள்ளார். கிளிநொச்சி மாவட்டத்திலுள்ள கூட்டுறவுச் சங்கங்களுக்கு ஆளுநர் நேற்று முன்தினம் கொள்கலன்களை கையளித்துள்ளார்;. இந்நிகழ்வு கிளிநொச்சி புள்ளியம் பொக்கனையிலுள்ள அரிசி ஆலை களஞ்சியத்தில் இடம்பெற்றது. இந்நிகழ்வில் பாரம்பரிய கைத்தொழில் மற்றும் சிறு தொழிலாண்மை அபிவிருத்தி அமைச்சர் கே.என்.டக்ளஸ் தேவாநந்தா மற்றும் பாராளுமன்ற குழுவின் பிரதி தலைவர் முருகேசு சந்திரகுமார் ஆகியோர் கலந்துக்கொண்டிருந்தனர். வட மாகாணத்திலுள்ள பெருமளவிலான களஞ்சியங்கள் யுத்தம் காரணமாக சேதமடைந்துள்ளன. தற்போது பெரும் போகம் ஆரம்பிக்கப்பட்டுள்ள நிலையில் நெல்லை களஞ்சியப்படுத்தும் வகையில் இந்த கொள்கலன்கள் வழங்கப்பட்டுள்ளன. இதன்மூலம் வட மாகாணத்தை சேர்ந்த விவசாயிகளும் மக்களும் பயனடைவர் எனவும் ஆளுநர் மேலும் தெரிவித்துள்ளார்.

இலங்கையிலுள்ள அனைத்து வெளிநாட்டு முகவர் நிலையங்களுக்கு கீழ் செயற்படும் தரகர்களாக செயற்படுபவர்கள் முகவர்களாக பதிவு செய்துகொள்ள வேண்டும்..!

2010-11-12T20:05:00.001+05:30

இலங்கையில் உள்ள அனைத்து வெளிநாட்டு முகவர் நிலையங்களுக்கு கீழ் செயற்படும் தரகர்களாக செயற்படுபவர்கள் முகவர்களாக பதிவு செய்துகொள்ள வேண்டும் என வெளிநாட்டு வேலைவாய்ப்பு பணியகத்தின் தலைவர் கிங்ஸ்லி ரணவக்க தெரிவித்துள்ளார். அனைத்து முகவர் நிலையங்களிலும் பதிவுசெய்யப்பட்டவர்கள் தொடர்பான விபரங்கள் டிசம்பர் 15ம் திகதிக்கு முன்னர் வெளிநாட்டு வேலைவாய்ப்பு பணியகத்திற்கு அனுப்பி வைக்கப்பட வேண்டும். இவ்வாறு முகவர்களாக செயற்படுபவர்கள் ஒரு முகவர் நிலையத்திற்கு கீழ் மாத்திரமே செயற்பட வேண்டும். வெளிநாடுகளுக்கு செல்பவர்களது பயணக் கடவுச்சீட்டு மற்றும் பணக்கொடுக்கல் வாங்கல்கள் மேற்கொள்ள முகவர்களுக்கு அனுமதி அளிக்கப்படவில்லை. இடைத்தரகர்களாக செயற்படும் இவர்கள் தனிப்பட்ட காரியாலயங்களை கொண்டு நடத்தமுடியாது. முகவர் நிலையங்களில் பதிவு செய்யும் முகவர்களுக்கு முகவர் நிலையத்தின் பெயரைக் கொண்ட அடையாள அட்டை வழங்குவதற்கு நடவடிக்கை எடுக்கப்படவுள்ளது என்றும் அவர் கூறியுள்ளார்.

வேலணை வல்லுறவு முயற்சி சந்தேகநபர்கள் விடுவிப்பு..!

2010-11-12T20:01:00.002+05:30

யாழ். வேலணை முதலாம் வட்டாரத்திலுள்ள வீடொன்றில் இரவுவேளை புகுந்து அங்கிருந்த யுவதியை இழுத்துவந்து பாலியல் குற்றம்புரிய முற்பட்டனரென்ற சந்தேகத்தின்பேரில் கைதுசெய்யப்பட்டு விளக்கமறியலில் வைக்கப்பட்ட இரு இளைஞர்களும் பிணையில் விடுதலை செய்யப்பட்டுள்ளனர். சந்தேகநபர்களின் சார்பில் மன்றில் தோன்றிய சட்டத்தரணி மு.றெமீடியஸ் தாக்கல்செய்த பிணை மனுவின் அடிப்படையிலேயே இவர்கள் இருவரும் விடுதலை செய்யப்பட்டிருக்கின்றனர். கடந்த மாதம் 9ம் திகதி வேலணை முதலாம் வட்டாரத்திலுள்ள வீடொன்றினுள் நள்ளிரவுவேளை நுழைந்த பத்திற்கும் மேற்பட்ட இளைஞர்கள் அங்கிருந்த யுவதியொருவரை வெளியே இழுத்து வந்து பாலியல் குற்றம் புரிய முயன்றுள்ளனர். இச்சந்தர்ப்பத்தில் குறித்த யுவதியின் சகோதரன், சகோதரி, மைத்துனி ஆகியோரும் இளைஞர்களால் தாக்கப்பட்டுள்ளனர். இதனால் அவமானம் தாங்கமுடியாத யுவதி அலரிவிதை உட்கொண்ட நிலையில் யாழ். போதனா வைத்தியசாலையில் அனுமதிக்கப்பட்டார். இது தொடர்பில் ஊர்காவற்றுறைப் பொலிஸார் விசாரணைகளை மேற்கொண்டு வருகின்றனர். பாதிக்கப்பட்ட யுவதி தற்போது பராமரிப்பு இல்லமொன்றில் தங்கவைக்கப்பட்டுள்ள நிலையில், இம்மாதம் முதலாம் திகதி ஊர்காவற்றுறை நீதிமன்றில் முற்படுத்தப்பட்டார். இவரின் வாக்கு மூலத்திற்கிணங்க யாழ். புறநகர்ப்பகுதியில் வைத்து கைதுசெய்யப்பட்ட இரு இளைஞர்கள் கடந்த 6ம் திகதி சனிக்கிழமை ஊர்காவற்றுறை மாவட்ட நீதிபதி இரா.வசந்தசேனன் முன்னிலையில் ஆஜர்ப்படுத்தப்பட்டுள்ளனர். இந்நிலையில் சந்தேகநபர்களின் சார்பில் மன்றில் தோன்றிய சட்டத்தரணி மு.றெமீடியஸ் விடுத்த பிணைமனுக் கோரிக்கையை ஏற்றுக்கொண்ட நீதிமன்றம், இருவரையும் தலா 20ஆயிரம் ரூபா காசுப்பிணையிலும் தலா 20ஆயிரம் ரூபா ஆட்பிணையிலும் விடுதலை செய்துள்ளது. எதிர்வரும் 19ம் திகதி இருவரையும் மன்றில் ஆஜராகுமாறும் உத்தரவிடப்பட்டுள்ளது.

ஜனஅளவெட்டியில் இளைஞர்மீது துப்பாக்கிச்சூடு, இளைஞர் படுகாயம்..!

2010-11-12T19:59:00.001+05:30

யாழ்ப்பாணம் அளவெட்டி, அளகொல்லைப் பிள்ளையார் கோவில் முன்றலில் வைத்து இளைஞர் ஒருவர் நேற்று மோட்டார் சைக்கிளில் வந்த இருவரால் சுடப்பட்டு படுகாயமடைந்துள்ளார். சிகிச்சைக்காக அவர் யாழ்.போதனா வைத்தியசாலையில் அனுமதிக்கப்பட்டுள்ளார். இந்தச்சம்பவம் நேற்றுமாலை 5.30 மணியளவில் இடம்பெற்றுள்ளது. நீண்ட நாள்களின் பின்னர் இடம்பெற்ற இவ்வாறான சம்பவத்தால் அப்பகுதியில் பெரும் பரபரப்பு ஏற்பட்டுள்ளது. சம்பவத்தில் அளவெட்டி வடக்கைச் சேர்ந்த கிருஸ்ணமூர்த்தி சஞ்சீத் (வயது 24) என்பவர் கையிலும் வயிற்றிலும் காயமடைந்துள்ளார். கந்தசஷ்டி உற்சவத்திற்காக நாதஸ்வரம் வாசித்துவிட்டு ஆலயத்துக்கு வெளியே சஞ்சீத் வந்போது தலைக்கவசம் அணிந்து மோட்டார் சைக்கிளில் வந்த இருவர் கைத்துப்பாக்கியால் இவர்மீது சுட்டுவிட்டுத் தப்பிச் சென்றுள்ளதாகப் பொலிஸார் தெரிவித்துள்ளனர். தனிப்பட்ட காரணங்களாலேயே இந்தத் தாக்குதல் இடம்பெற்றது என சஞ்சீதின் உறவினர்கள் கூறிகின்றனர். சூட்டுச் சம்பவம் தொடர்பாக தெல்லிப்பழை பொலிஸில் முறைப்பாடு செய்யப்பட்டுள்ளது. அத்துடன் சம்பவ இடத்துக்கு பொலிஸாரும் அளவெட்டி இராணுவத்தினர் சென்று விசாரணை நடத்தியுள்ளனர். மேலதிக விசாரணைகளை தெல்லிப்பழை பொலிஸார் மேற்கொண்ட வருகின்றனர். யுத்தம் முடிவடைந்த ஒன்றரை வருடங்களுக்கு மேலாகிவிட்ட நிலையில் யாழ்ப்பாணத்தில் மீண்டும் துப்பாக்கிச் சூட்டுச் சம்பவம் ஒன்று இடம்பெற்றிருப்பது யாழ்ப்பாண மக்களிடையே கிலியை ஏற்படுத்தியுள்ளது.

சமாதான நீதிவான்களின் மனித உரிமைகள் அமைப்பினரின் வேலைத்திட்டம்..!

2010-11-12T19:57:00.001+05:30

வென்னப்புவவிலுள்ள சமாதான நீதிவான்களின் மனித உரிமைகள் அமைப்பினர் அங்கத்தவரின் தொழிலாண்மை மற்றும் செயற்றிறனை மேம்படுத்தும் பொருட்டு பல வேலைத்திட்டங்களை நாடெங்கிலும் அமுல்படுத்தவுள்ளனர். இதனடிப்படையில், நேற்றுமுதல் 2011 ஜனவரி 31ம் திகதி வரையிலுள்ள வேலைத்திட்ட விபரங்களை நிருவாகப் பணிப்பாளர் பேராசிரியர் டீ.எஸ்.ஜயந்த களுபோவில அனுப்பி வைத்துள்ளார். ஐந்தாவது மனித உரிமை அமைப்பின் 5 ஆவது விழாவிற்கு முன்னோடியாக அங்கத்தவர் மதிப்பீட்டு வேலைதிட்டம் மாகாண ரீதியில் இடம் பெறவுள்ளதுடன் சேவை மதிப்பீட்டு நேர்முகப்பரீட்சையும் இடம்பெறவுள்ளது. சேவை விருது வழங்கல்நிகழ்வு பாராளுமன்றத்திற்கு முன்னால் உள்ள லோட்டஸ் எஜ் ஹோட்டலில் அடுத்த வருடம் 2011 ஜனவரி 11ல் நடைபெறும். மனித உரிமை பயிற்சி வேலைத்திட்டத்தில் இணைந்து செயலாற்றியோருக்கான சான்றிதழ் வழங்கும் நிகழ்வு எதிர்வரும் டிசம்பர் 22ம் திகதியில் நடைபெறுமென நிருவாகப் பணிப்பாளர் தெரிவித்துள்ளார். இதேவேளை 2011ஆம் ஆண்டிற்கான அடையாள அட்டை, நாட்குறிப்பேடு மற்றும் மும்மொழி நூல்கள் என்பன டிசம்பர் 28ஆம் திகதி வழங்கப்படுமெனவும் அவர் தெரிவித்துள்ளார். வர்த்தகத்துறையில் தடம் பதித்த உள்நாடு, வெளிநாட்டிலுள்ள 50 பேருக்கும் சுனாமியின் போது சேவையாற்றிய 10 சமூகசேவை அமைப்பினருக்கான விருதுகளும் வழங்கப்படுமெனவும் அவர் குறிப்பிட்டுள்ளார். அமைப்பில் அரும்பணியாற்றிய 100 பேருக்கான சேவை மதிப்பீட்டு விருதும் நெஞ்சுப்பட்டி, இலச்சினை, விசேட காப்புறுதி திட்டம் என்பனவும் இதில் அடங்கவுள்ளமை குறிப்பிடத்தக்கது.

அக்கரைப்பற்று அம்பாறை பஸ் சேவையை ஆரம்பிக்கக் கோரிக்கை..!

2010-11-12T19:54:00.001+05:30

அம்பாறை மாவட்டத்தின் கரையோரப் பகுதிகளான அக்கரைப்பற்று, அட்டாளைச்சேனை, ஒலுவில், நிந்தவூரிலிருந்து சம்மாந்துறை மற்றும் அம்பாறை போன்ற பிரதேசங்களுக்கு தொழிலுக்காக செல்லும் உத்தியோகத்தர்கள் மற்றும் தொழில்நுட்பக் கல்லூரிக்கு செல்லும் மாணவர்களின் நலன்கருதி அக்கரைப்பற்றிலிருந்து காரைதீவு வழியாக அம்பாறைக்கு இ.போ.ச. பஸ் சேவை ஒன்றினை ஆரம்பிக்குமாறு கோரிக்கை விடுக்கப்பட்டுள்ளது. ஏற்கனவே,ஆரம்பிக்கப்பட்டிருந்த இந்த பஸ்சேவை கடந்த சில மாதங்களாக நிறுத்தப்பட்டுள்ளதனால் அம்பாறைக்கு செல்லும் அரச மற்றும் தனியார் துறை உத்தியோகத்தர்களும் ஊழியர்களும் காரைதீவில் இறங்கி கல்முனையில் இருந்து அம்பாறைக்கு செல்லும் பஸ்ஸிலேயே ஏறவேண்டியுள்ளது. கல்முனையில் இருந்து வரும் பஸ் அதிகமான பயணிகளை ஏற்றி வருவதனால் சில வேளைகளில் காரைதீவில் நிறுத்தாமலேயே செல்கின்றது. அப்படி நிறுத்தப்பட்டாலும் கூடிய தூரம் நின்று கொண்டு பயணம் செய்ய வேண்டியுள்ளது.இதனால் பெண்கள்,வயோதிபர் மற்றும் நோயாளிகள் பெரும் அவஸ்தைக்குள்ளாகின்றன. இதனைக் கருத்திற்கொண்டு மீண்டும் அக்கரைப்பற்றிலிருந்து காரைதீவு சந்திவழியான அம்பாறை பஸ்ஸினை சேவையில் ஈடுபடுத்துமாறு கோரிக்கை விடுக்கப்பட்டுள்ளது.

யாழ். தேசிய வாசிப்புமாத பரிசளிப்பும், வள்ளுவர்சிலை திறப்பும்..!

2010-11-12T19:52:00.001+05:30

யாழ்ப்பாணம் சாவகச்சேரி பிரதேசசபையின் கச்சாய் பொதுநூலக அபிவிருத்தி ஆலோசனைச் சபையால் நடத்தப்படும் தேசிய வாசிப்புமாத பரிசளிப்பும் வள்ளுவர்சிலை திறப்புவிழாவும் ஞாயிற்றுக்கிழமை காலை 9.30 மணிக்கு சபையின் செயலாளர் வே. சிவராஜலிங்கம் தலைமையில் இடம்பெறவுள்ளன. நிகழ்வில் பிரதம விருந்தினராக தென்மராட்சிப் பிரதேச செயலாளர் திருமதி அஞ்சலிதேவி சாந்தசீலன் கலந்து கொள்ளவுள்ளார். இளைப்பாறிய அதிபர் எஸ். சின்னையா நூலகத்திற்கென அன்பளிப்புப் பொருட்களை நிகழ்வில் வைத்து வழங்கவுள்ளார்.

யாழ். துரையப்பா விளையாட்டரங்கில் ஜனவரி 21, 22, 23ஆம் திகதிகளில் சர்வதேச வர்த்தகக் கண்காட்சி..!

2010-11-12T19:50:00.001+05:30

யாழ்ப்பாணம் வர்த்தக தொழிற்றுறை மன்றமும் வரையறுக்கப்பட்ட இலங்கை கண்காட்சிகள் மற்றும் மாநாடுகள் சேவைகள் தனியார் நிறுவனமும் இணைந்து யாழ். துரையப்பா விளையாட்டரங்கில் ஜனவரி மாதம் 21, 22, 23ஆம் திகதிகளில் சர்வதேச வர்த்தகக் கண்காட்சியொன்றை நடத்துவதற்கு ஏற்பாடு செய்துள்ளன.உள்நாட்டு, வெளிநாட்டு உற்பத்தி சேவை வழங்குநர்களுடன், வடமாகாண உற்பத்தி சேவை வழங்குநர்களும் இணைந்து தமது உற்பத்தி சேவைகளைக் காட்சிப்படுத்துவதற்கு ஏதுவாக 200 காட்சிக்கூடங்கள் அமைக்கப்படவுள்ளன. தற்போதைய சமாதானச் சூழலில் கைத்தொழில் முயற்சியாளர்கள் அதி நவீன தொழில் நுட்பங்களுடனான தொழில் முயற்சிகளை முன்னெடுப்பது, தர முகாமைத்துவத்துடனான சந்தைப்படுத்தல், மற்றும் சர்வதேச தொடர்புகளை ஏற்படுத்துதல் புதிய தொழில் முயற்சிகளை உருவாக்குவதற்கேற்ற வழிமுறைகளைக் கண்டறிதல் போன்றவற்றிற்கு மிகச்சிறந்த வாய்ப்பாக இக் கண்காட்சி அமையவுள்ளது. எனவே, மேற்படி கண்காட்சியில் பங்கேற்க ஆர்வமுள்ளோர் இலக்கம் 175, பருத்தித்துறை வீதி, ஆனைப்பந்தி, யாழ்ப்பாணம் எனும் முகவரியிலுள்ள யாழ்ப்பாணம் வர்த்தக தொழிற்றுறை மன்ற அலுவலகத்துடன் எதிர்வரும் 20ஆம் திகதிக்கு முன்னர் தொடர்புகொண்டு காட்சிக்கூடங்களைப் பதிவு செய்யுமாறு கேட்டுக் கொள்ளப்படுகின்றனர்.

கொழும்பில் பெய்துவரும் கடும் மழையினால் கொழும்பு நகரின் வீதிகள் முழுவதும் வெள்ளநீர்..!

2010-11-11T20:10:00.000+05:30

கொழும்பில் நேற்றுமாலை முதல் பெய்துவரும் கடும் மழையினால் கொழும்பு நகரின் வீதிகள் முழுவதும் வெள்ளநீர் செல்கிறது. இதனால் கொழும்பின் ஹெட்டியாவத்தை கொட்டாஞ்சேனை, வஜிரா வீதி, ஹெவலொக் வீதி, ஆயர்வேத சந்தி, பௌத்தாலோக்க மாவத்தையின் சிலபகுதிகள், மருதானை, வார்ட் பிளேஸ், மற்றும் புறநகர் பகுதிகளிலும் பல வீதிகள் வெள்ளத்தினால் மூழ்கியுள்ளன. கொழும்பில ;கடந்த 18ஆண்டுகளின் பின்னர் முதல்தடவையாக 400 மில்லிமீற்றருக்கும் அதிகமான மழைவீழ்ச்சி இன்றுகாலை 7 மணிவரை பதிவாகியுள்ளதாக வானிலை அவதான நிலையம் தெரிவித்துள்ளது. சீரற்ற காலநிலை இன்று மாலைவரை தொடரும் எனவும் இடி, மின்னலின் தாக்கம் காணப்படும் எனவும் பொது மக்கள் அவதானத்துடன் நடந்துகொள்ளுமாறும் வானிலை அவதானநிலையம் அறிவுறுத்தியுள்ளது.

மலையக மக்களின் லயன் குடியிருப்புக் கலாசாரம் மாற்றியமைக்கப்பட்டு தனித்தனி வீடுகள் கட்டிக் கொடுக்கப்படவேண்டும்-வீ.இராதாகிருஸ்ணன் எம்.பி..!

2010-11-11T20:07:00.000+05:30

மலையக மக்களின் லயன் குடியிருப்புக் கலாசாரம் மாற்றியமைக்கப்பட்டு அம்மக்களுக்கும் தனித்தனி வீடுகள் கட்டிக் கொடுக்கப்படவேண்டும். அத்தோடு தீர்க்கப்படாமல் இருக்கும் அம்மக்களின் இதர பிரச்சினைகளும் தீர்க்கப்படவேண்டும் என்று மலையக மக்கள் முன்னணியின் புதிய அரசியல்துறை தலைவரும் எம்.பியுமான வீ.இராதாகிருஷ்ணன் தெரிவித்துள்ளார். கொழும்பு கோல்பேஸ் ஹோட்டல் கேட்போர் கூடத்தில் இடம்பெற்ற செய்தியாளர் மாநாட்டின்போதே அவர் இதனைத் தெரிவித்துள்ளார். மலையக மக்களுக்கான தனித்தனி வீட்டுத் திட்டத்தினை முதன்முதலில் ஆரம்பித்துவைத்தவர் மலையக மக்கள் முன்னணியின் முன்னாள் தலைவரும் அமரருமான பெ.சந்திரசேகரன் ஆவார். அவ்வேலைத்திட்டத்தினூடாக 25 ஆயிரம் வீடுகள் அமைத்துக் கொடுக்கப்பட்டன. நான் 1982ம் ஆண்டு இலங்கை தொழிலாளர் காங்கிரஸின் ஊடாக எனது அரசியல் பயணத்தினை ஆரம்பித்தேன். அதன் அடிப்படையில் பிரதேச சபை, நகரசபை, மாகாணசபை மற்றும் நாடாளுமன்றம் என 28 வருடங்களாக அரசியலில் இருக்கின்றேன். எனது அரசியல் பயணத்தில் மலையக மக்களுக்கு என்னாலான சேவைகளை செய்துள்ளேன். தற்போது மலையக மக்கள் முன்னணியில் இணைந்து கொண்டுள்ளதுடன் அரசியல் துறை தலைவராகவும் பொறுப்பேற்றுள்ளேன். எனவே இனி முன்னணியின் அரசியல் கொள்கைக்கு அமைவாக எனது அரசியல் நகர்வுகளை முன்னெடுத்துச் செல்வேன். நான் எந்தச் சந்தர்ப்பத்திலும் என்னை அரசியலுக்கு அறிமுகப்படுத்திய அமரர் சௌமிய மூர்த்தி தொண்டமானை மறக்கமாட்டேன். அவரே எனது அரசியல் குருவாவார். நாளை பொருளாதார அபிவிருத்தி அமைச்சர் பசில் ராஜபக்ஷவை சந்திக்கவுள்ளேன். அதன்போது மலையக மக்களின் பிரச்சினைகள் குறித்து பேசவுள்ளேன். அதேபோன்று வெகுவிரைவில் ஜனாதிபதி மஹிந்த ராஜபக்ஷவையும் சந்திக்கவுள்ளேன் என்று அவர் மேலும் தெரிவித்துள்ளார்.

ஆயிரம் பஸ்களை சேவையில் ஈடுபடுத்த நடவடிக்கை..!

2010-11-10T12:30:00.001+05:30

நாடுபூராவும் உள்ள இ.போ.ச. டிப்போக்களில் பயன்படுத்தப்படாது கைவிடப்பட்டுள்ள ஆயிரம் பஸ்களை திருத்தி சேவையில் ஈடுபடுத்த நடவடிக்கை எடுத்துள்ளதாக இ.போ.ச. தலைவர் எம்.டி. பந்துசேன கூறினார். முதற்கட்டமாக ஜனாதிபதியின் 2வது பதவி ஏற்பு வைபவத்தை முன்னிட்டு 250 பஸ்களை திருத்தி சேவையில் இடவுள்ளதாகவும் அவர் குறிப்பிட்டுள்ளார். கைவிடப்பட்டுள்ள பஸ்களை திருத்தி சேவையில் ஈடுபடுத்து மாறு போக்கு வரத்து அமைச்சர் குமார வெல்கம சம்பந்தப் பட்ட அதிகாரிகளுக்கு பணித்துள்ளார். இதன் படி சகல டிப்போக்களிலும் குறைந்தது ஒரு பஸ் வண்டியையாவது திருத்தி சேவையில் ஈடுபடுத்தப்பட உள்ளதாகவும் தலைவர் தெரிவித்துள்ளார்.

கொக்குவில் இந்துக் கல்லூரியின் பரிசளிப்பு விழா..!

2010-11-10T12:28:00.003+05:30

யாழ்ப்பாணம் கொக்குவில் இந்துக் கல்லூரியின் பரிசளிப்பு விழா நாளை மறுதினம் 12ம்திகதி வெள்ளிக்கிழமை பிற்பகல் 2மணிக்கு அதிபர் அ.அகிலதாஸ் தலைமையில் பஞ்சலிங்கம் மண்டபத்தில் நடைபெறும். பிரதம விருந்தினராக கல்லூரியின் பழைய மாணவர் சமூகப் புரவலர் மாணிக்கம் சுப்பிரமணியம் கலந்து கொள்வார். பரிசில்களை மலதி சுப்பிரமணியம் வழங்கி வைப்பார். ஆசியுரையை கொக்குவில் கிருபாகர சிவசுப்பிரமணிய கோயில் பிரதமகுரு சிவசிறீ எஸ். சிவதாசக் குருக்களும், வாழ்த்துரையை நல்லூர் கல்விக் கோட்டப்பணிப்பாளர் எஸ். மாணிக்கராஜா, கொக்குவில் இந்து ஆரம்ப பாடசாலை அதிபர் எஸ்.சகாதே வன் ஆகியோரும் வழங்கவுள்ளனர்.

புனர்வாழ்வளிக்கப்பட்ட முன்னாள் புலி உறுப்பினர்களுக்கு சுதந்திர நடமாட்டம் இல்லை..!

2010-11-10T12:25:00.002+05:30

புனர்வாழ்வளிக்கப்பட்ட முன்னாள் புலிகள் அமைப்பின் போராளிகளின் சுதந்திரமான நடமாட்டம் தொடர்பில் அமைச்சர்களும், அதிகாரிகளும் வௌ;வேறான கருத்துக்களைத் தெரிவிக்கின்றனர். முன்னாள் போராளிகளை சமூகத்தில் எவ்வாறு இணைத்துக் கொள்வது என்பது தொடர்பில் பொதுமக்களுக்கும் அரச அதிகாரிகளுக்கு மதத் தலைவர்களுக்கும் இராணுவம் பாடம்நடத்தி வருகையில் இந்த முரண்பாடு வெளிவந்துள்ளது. புனர்வாழ்வளிக்கப்பட்டு விடுதலை செய்யப்படும் முன்னாள் போராளிகள் விடுவிக்கப்பட்ட பின்னர் சமூகத்தில் சுதந்திரமாக வாழ முடியும் என்றும் இவர்களுக்கு எவரும் இடையூறு விளைவிக்க முடியாது என்றும் சிறைச்சாலைகள் மறுசீரமைப்பு மற்றும் புனர்வாழ்வு அமைச்சர் டியூ குணசேகர தெரிவித்துள்ளார். ஆனால், யாழ். நகரில் விடுவிக்கப்பட்ட முன்னாள் போராளிகள் நாளாந்தம் அல்லது வாராந்தம் அச்செழு, ஊரெழு இராணுவ முகாம்களில் கைச்சாத்திடவேண்டும் என இராணுவத்தினர் வற்புறுத்துகின்றனர் என புனர்வாழ்வளிக்கப்பட்ட முன்னாள் போராளிகளின் பெற்றோர்கள், உறவினர்கள் விசனம் தெரிவிக்கின்றனர். இந்நிலையில் இது தொடர்பாக புனர்வாழ்வு ஆணையாளர் பிரிகேடியர் சுசந்த ரணசிங்கவிடம் தொடர்புகொண்டு கேட்டபோது, புனர்வாழ்வளிக்கப்பட்டவர்கள் இரண்டு அல்லது மூன்று மாதங்களுக்கு இராணுவ முகாமில் கைச்சாத்திடவேண்டும். இது அவர்களின் நலன் கருதியே மேற்கொள்ளப்படுகின்றது. இறுதிக்கட்ட யுத்தத்தின்போது சரணடைந்த மற்றும் கைதுசெய்யப்பட்ட முன்னாள் போராளிகளுக்கு உரிய முறையில் புனர்வாழ்வளித்து அவர்களை விடுவித்தோம். எனினும், சமூகத்தில் அவர்களுக்குப் பிரச்சினைகள் இருக்கின்றன. அவர்களின் பாதுகாப்பை உறுதிப்படுத்திக்கொள்வதற்காகவே இந்நடவடிக்கை மேற்கொள்ளப்படுகின்றது. இரண்டு அல்லது மூன்று மாதங்களின் பின்னர் இந்நடவடிக்கை படிப்படியாகக் குறைக்கப்படும். எனினும், முன்னாள் போராளிகளுக்குத் தொழில்வாய்ப்பு எதுவும் கிட்டினால் பொலிஸ் சான்றிதழ் ஒன்றை பெற்றுக்கொண்டு அவர்கள் தொழிலுக்குச் செல்லமுடியும். இந்தப் பொலிஸ் சான்றிதழும் அவர்களின் பாதுகாப்புக் கருதியே வழங்கப்படும். முன்னாள் போராளிகளுக்கு புனர்வாழ்வளித்து அவர்களை விடுதலை செய்வது மட்டுமல்ல எமது கடமை. அவர்களை சமூகத்தில் நல்லதொரு நிலைக்குக் கொண்டுவரும் வரை கண்காணிப்பதே எமது நோக்கம். இதில் வேறு எந்த உள்நோக்கமும் இல்லை என்று கூறியுள்ளார். அதேவேளை, முன்னாள் போராளிகளை விடுவிக்கும்போதெல்லாம் அவர்கள் சமூகத்தில் இனி எதுவித தடையுமின்றி வாழலாம். அவர்களுக்கு எவரும் நிபந்தனைகளை விதிக்க முடியாது. அவ்வாறு விதித்தால் சட்ட நடவடிக்கை எடுக்கப்படும் என நீங்கள் தெரிவித்தீர்கள். எனினும், தற்போது முகாம்களில் அவர்கள் கைச்சாத்திடவேண்டும் என்று நிபந்தனை போடுகின்றீர்களே என்று சிறைச்சாலைகள் மறுசீரமைப்பு மற்றும் புனர்வாழ்வு அமைச்சர் டியூ.குணசேகரவிடம் கேட்டபோது, இவ்வாறானதொரு நடவடிக்கை இடம்பெறவில்லை. அது குறித்து இன்னும் எனக்கு எவரும் அறிவிக்கவில்லை. அவ்வாறு இடம்பெற்றால் அது குறித்து கவனம் செலுத்தப்படும்என்றார். எது எப்படியிருப்பினும், இந்த நடவடிக்கையை அரசு மேற்கொள்வதன் மூலம் அவர்களை இச்சமூகத்தில் தீவிரவாத கண்ணோட்டத்துடனேயே அரசு இன்னும் பார்க்கின்றது என மக்கள் விசனம் தெரிவித்துள்ளனர்.

யாழ். மாவட்ட அபிவிருத்திக்கு 909 மில்லியன் ரூபா கட்டுநிதி..!

2010-11-10T12:23:00.001+05:30

யாழ். மாவட்ட அபிவிருத்திக்கு 909 மில்லியன் ரூபா கட்டுநிதி கிடைத்திருப்பதாக யாழ்.மாவட்ட அரசாங்க அதிபர் திருமதி சுகுமார் இமெல்டா தெரிவித்துள்ளார். யாழ். செயலகத்தில் இடம்பெற்ற பொருளாதார அபிவிருத்தி அமைச்சின் வடக்கின் துரித அபிவிருத்தித் திட்டத்தின் செயல்பாடுகள் மீள்பரிசீலனை செய்யும் மாதாந்த கூட்டத்தில் அவர் இத்தகவலை வெளியிட்டுள்ளார். இந்நிதியில் குடாநாட்டில் 64 வீதிகளை அபிவிருத்தி செய்ய 379 மில்லியன் ரூபாவும், 11 பலநோக்குக் கூட்டுறவுச் சங்கங்களை புனரமைக்க 26 மில்லியன் ரூபாவும் 12 பொதுக் கட்டடங்களை புனரமைக்க 203 மில்லியன் ரூபாவும் செலவிடப்படவுள்ளன. இதேவேளையில், யாழ். மாவட்டத்தில் குடிநீர் வழங்கல் நடவடிக்கைக்கு 250 மில்லியன் ரூபாவும் 16 பாடசாலைகளில் மேலதிக வளங்களை மேம்படுத்த 34 மில்லியன் ரூபாவும் நீர்ப்பாசன மேம்பாட்டுக்கு 15 மில்லியன் ரூபாவும் ஒதுக்கப்பட்டுள்ளன. முன்மொழியப்பட்ட திட்டங்களில் முதன்மையான வேலைகள் பிரதேச செயலகங்கள், பிரதேசசபைகள், கல்வித் திணைக்களம், நீர்ப்பாசன திணைக்களம், நீர்வழங்கல் மற்றும் வடிகாலமைப்புசபை, யாழ். செயலகம் ஆகியவற்றால் இத்திட்டங்கள் செயல்படுத்தப்படவுள்ளன. கேள்விகள் கோரப்பட்டு வேலைகள் தனியார் ஒப்பந்தகாரர்களிடம் ஒப்படைக்கப்படவுள்ளன.

வடக்கு கிழக்கிலிருந்து அதிக இளைஞர் யுவதிகள் இளைஞர் பாராளுமன்றத்திற்கான தேர்தலில் போட்டி..!

2010-11-09T22:24:00.002+05:30

வடக்கு கிழக்கிலிருந்து கூடுதலான இளைஞர் யுவதிகள் இம்முறை இளைஞர் பாராளுமன்றத்திற்கான தேர்தலில் போட்டியிடவுள்ளதாக இளைஞர் விவகார அமைச்சர் டலஸ் அழகப்பெரும தெரிவித்துள்ளார். இளைஞர் விவகார அமைச்சின் கேட்போர் கூடத்தில் நேற்று இடம்பெற்ற செய்தியாளர்கள் சந்திப்பின்போதே அமைச்சர் இவ்வாறு தெரிவித்துள்ளார். இளைஞர் பாராளுமன்றத்திற்கான தேர்தல் இம்மாதம் 27ம் திகதி நடைபெறவூள்ளது. நாடளாவிய ரீதியில் 332 தேர்தல் நிலையங்களில் தேர்தல் நடத்தப்படும். முதல் அமர்வு டிசம்பர் 12ம் திகதி ஜனாதிபதியின் தலைமையில் மஹரகம இளைஞர் சேவை மன்றத்தில் நடைபெறும். இளைஞர் பாராளுமன்றத்திற்கான வேட்புமனுத்தாக்கல் நாளை பிற்பகல்வரை இடம்பெறும். 332 உறுப்பினர்களை தெரிவுசெய்வதற்காக 1934 வேட்புமனுக்கள் தாக்கல் செய்யப்பட்டுள்ளன. இத்தேர்தலுக்கான பிரசார நடவடிக்கைகள் இம்மாதம் 25ம் திகதியுடன் நிறைவடையும் என்றும் அவர் மேலும் தெரிவித்துள்ளார்.

சிறைச்சாலை நிர்வாகத்தை இராணுவக் கட்டுப்பாட்டின்கீழ் கொண்டுவருமாறு ஆர்ப்பாட்டம்..!

2010-11-09T22:21:00.003+05:30

சிறைச்சாலைகள் ஆணையாளர் மற்றும் அதிகாரிகளைக் கைதுசெய்து அதன் நிர்வாகத்தை இராணுவக் கட்டுப்பாட்டின்கீழ் கொண்டுவருமாறு வெலிக்கடை சிறைச்சாலைக்கு முன்பாக நடத்தப்பட்ட ஆர்ப்பாட்டம் காரணமாக முன்னாள் இராணுவத்தளபதி சரத்பொன்சேகாவின் விடுதலை வேண்டி அங்கவீனமுற்ற இராணுவவீரர்களால் ஏற்பாடு செய்யப்பட்டிருந்த ஆர்ப்பாட்டம் இடம்மாற்றப்பட்டுள்ளது. 30மாத சிறைத்தண்டனை அனுபவித்து வருகின்ற முன்னாள் இராணுவத் தளபதியும் ஜனநாயக தேசியக் கூட்டணியின் தலைவருமான சரத் பொன்சேகாவை விடுதலை செய்யுமாறு வலியுறுத்தும் ஆர்ப்பாட்டம் ஒன்றை வெலிக்கடை சிறைச்சாலைக்கு முன்பாக நடத்துவதற்கு நேற்று அங்கவீனமுற்ற மற்றும் ஓய்வுபெற்ற இராணுவ வீரர்களால் ஏற்பாடு செய்யப்பட்டிருந்தது. பொரளை கெம்பல் மைதானத்துக்கு அருகில் கூடி அங்கிருந்து பேரணியாக சென்று சிறைச்சாலைக்கு முன்பாக ஆர்ப்பாட்டத்தை நடத்துவதென்றே தீர்மானிக்கப்பட்டிருந்தது. எனினும் அரசதரப்பு ஆதரவாளர்கள் நூற்றுக்கணக்கானோர் வெலிக்கடை சிறைச்சாலைக்கு முன்பாகக் கூடி நேற்று முன்தினம் சிறைக்கைதிகளால் பொலிஸார்மீது நடத்தப்பட்ட தாக்குதலுக்கு எதிர்ப்புத் தெரிவித்தும் அதேநேரம் இந்தத்தாக்குதலுக்கு ஆதரவாக செயற்பட்டதாக சிறைச்சாலைகள் ஆணையாளர், அதிகாரிகள் ஆகியோர்மீது குற்றம் சுமத்தியதுடன் அவர்களைக் கைதுசெய்து சிறைச்சாலைகள் நிர்வாகத்தை இராணுவக் கட்டுப்பாட்டின் கீழ் கொண்டுவருமாறும் வலியுறுத்தி ஆர்ப்பாட்டத்தில் ஈடுபட்டிருந்தனர். இதன்போது நூற்றுக்கணக்கான பொலிஸார் பாதுகாப்புக் கடமையில் ஈடுபடுத்தப்பட்டிருந்தமை குறிப்பிடத்தக்கது, இதேவேளை, அங்கவீனமுற்ற இராணுவ வீரர்களும் கெம்பல் மைதானத்துக்கு அருகில் கூடி நின்றிருந்தனர். இதனை அவதானித்த பொலிஸார் இரண்டு வௌ;வேறு ஆர்ப்பாட்டங்கள் ஒரேயிடத்தில் நடத்தப்படுவது சாத்தியமற்றது என்றும் அது பிரச்சினைகளுக்கும் வழிவகுத்து விடும் என்றும் கூறியதுடன் கொழும்பின் வேறு எந்த பகுதியிலாவது சென்று உங்களது ஆர்ப்பாட்டத்தை நடத்திக் கொள்ளுங்கள் என்று பொன்சேகா தரப்பு ஆதரவாளர்களிடம் கேட்டுக்கொண்டனர். இதனையடுத்து அவர்களது எதிர்ப்பு ஆர்ப்பாட்டம் உடனடியாக கொழும்பு லிப்டன் சுற்றுவட்டத்திற்கு மாற்றப்பட்டது. கொழும்பு தெவட்டஹா பள்ளிக்குமுன்பாக கூடிய மேற்படி இராணுவவீரர்கள் அவ்விடத்தில் நின்றவாறு ஜனாதிபதிக்கு எதிராகவும் அதேநேரம் பொன்சேகாவுக்கு ஆதரவாகவும் பாரிய கோஷத்தை எழுப்பினர். இதன்பின்னர் லிப்டன் சுற்றுவட்டம் வரையில் பேரணியாக வந்து சுற்று வட்டத்தில் நின்று ஆர்ப்பாட்டத்தில் ஈடுபட்டதுடன் சரத்பொன்சேகாவை விடுதலை செய்யும் பயணத்துக்காக உறுதிமொழிகளும் எடுத்துக்கொண்டனர்.

வெள்ளவத்தை கடற்கரையில் பெண்ணொருவரின் சடலம் கரையொதுங்கியது..!

2010-11-09T22:17:00.002+05:30

கொழும்பு, வெள்ளவத்தை கடற்கரையில் நேற்று நண்பகல் பெண்ணொருவரின் சடலம் கரையொதுங்கியுள்ளது. குறித்த பெண்ணின் சடலத்தினை இதுவரையிலும் அடையாளம் காணமுடியாதுள்ளதென தெரிவிக்கும் வெள்ளவத்தை பொலிஸார் சம்பவம் தொடர்பிலான மேலதிக விசாரணைகளை நடத்தி வருகின்றனர். கரையொதிங்கிய சடலம் பிரேத பரிசோதனைக்காக களுபோவில வைத்தியசாலையில் ஒப்படைக்கப்பட்டுள்ளது. 35வயது மதிக்கத்தக்க பெண்ணொருவரின் சடலமே கரையொதிங்கியது. அப்பெண் ரோஸ் நிறத்திலான சல்வார் அணிந்திருந்ததுடன் கால்விரலில் மிஞ்சியும் அணிந்திருந்தார். இதிலிருந்து அவர் ஒரு தமிழ்ப் பெண்ணாக இருக்கலாமென ஊகிக்கப்படுகிறது.

உலகில் ஏற்பட்ட அனைத்து சமூகப் புரட்சிகளுக்கும் ஊடகங்கள் முக்கிய காரணமாக இருந்துள்ளன-அமைச்சர் ரம்புக்வெல..!

2010-11-09T22:15:00.001+05:30

இன்று உலகின் மூன்றாவது மாபெரும் சக்தியாக ஊடகங்கள் உருவெடுத்துள்ளதை முழு உலகமும் ஏற்றுக் கொண்டுள்ளது என்று தகவல் ஊடகத்துறை அமைச்சர் கெஹெலிய றம்புக்வெல தெரிவித்துள்ளார். இன்று வத்துகாமம் கல்வி வலயத்திலுள்ள ஏ. ரத்நாயக்கா மத்திய கல்லூரியில் இடம்பெற்ற ஊடகம் தொடர்பான செயலமர்வில் பிரதம அதிதியாகக் கலந்து கொண்டு உரையாற்றும்போதே அவர் இதனைத் தெரிவித்துள்ளார். பாடசாலை மாணவர்கள் கலந்து கொண்ட இச்செயலமர்வில் அவர் மேலும் தெரிவிக்கையில், உலக வரலாற்றை எடுத்துப் பார்க்கும்போது உலகில் ஏற்பட்ட அனைத்து சமூகப் புரட்சிகளுக்கும் ஊடகங்கள் முக்கிய காரணமாக இருந்துள்ளன. அதேபோல் முக்கியத்துவம் வாய்ந்தவை எனக் கூறக் கூடிய பல்வேறு சமூக மாற்றங்களிலும் ஊடகங்கள் முக்கிய பங்களிப்புச் செய்துள்ளன. நாளைய உலகில் கொடுக்கல் வாங்கல் செய்யக் கூடியவர்கள் இன்றைய மாணவர்கள். எனவே இன்றைய மாணவர்கள் ஊடகங்கள் பற்றி தெளிவாக அறிந்திருத்தல் அவசியமாகும். ஒருவருக்குச் சந்தர்ப்பங்கள் வழங்குவதன் மூலமே அவரை திறமையானவராக அல்லது விற்பன்னராக உருவாக்க முடியும். எனவே சந்தர்ப்பத்தை ஏற்படுத்திக் கொடுப்பது பாடசாலை நிர்வாகிகளின் கடமையாகிறது. எனவே ஆசிரியர்களும் அரசியல்வாதிகளும் இணைந்து மாணவ சமுதாயத்திற்குச் சந்தர்ப்பங்களை ஏற்படுத்திக் கொடுக்க வேண்டும் என்று குறிப்பிட்டுள்ளார்.

இலங்கை மாணவர்களின் படிப்பிற்கு நடிகர் கருணாஸ் உதவி..!

2010-11-09T15:00:00.002+05:30

தமிழ்நாட்டில் வாழும் இலங்கை மாணவர்களின் படிப்பிற்கு நடிகர் கருணாஸ் உதவி செய்துள்ளார். இலங்கையில் இருக்கும் மக்கள் பிரச்சனைக்கு உள்ளாவதைப் போல, இங்கு இருக்கும் சில நடிகை நடிகர்களும் இலங்கைக்கு போனதாலும், போக முயன்றதாலும் பிரச்சனைகளில் சிக்கிக் கொண்டார்கள். அதில் கருணாஸ{ம் ஒருவர். அன்மையில் இவர் இலங்கையில் உள்ள முருகன் கோவிலில் தனது குழந்தைக்கு முடி இறக்க செல்ல முயன்றதால் சர்ச்சையில் சிக்கினார். இந்நிலையில், தமிழ்நாட்டில் உள்ள அனைத்து அகதிகள் முகாம்களிலும் உள்ள நன்றாக படிக்கும் முப்பதுக்கும் மேற்பட்ட மாணவ மாணவியரை தேர்வுசெய்து அவர்களில் உயர்கல்விக்கு கருணாஸ் உதவி செய்து வருகிறார். எம்.பி.ஏ, எம்.சி.ஏ, எம்.பி.பி.எஸ் என படித்துவரும் இந்த மாணவர்களுக்கு சென்னை, மதுரை, திண்டுக்கல், கோவை என்று பல்வேறு கல்லூரிகளில் இவர்களை படிக்க வைத்தும் வருகிறார். தீபாவளி பண்டிகையை முன்னிட்டு அவர்களை அழைத்து புத்தாடை, இனிப்பு போன்றவற்றை வழங்கி அவர்களுக்கு இன்ப அதிர்ச்சி கொடுத்துள்ளார்.

வடபகுதி வைத்தியசாலைகளுக்கு அம்பியுலன்ஸ் வண்டிகள், நடமாடும் பற்சிகிச்சை கிளினிக் வாகனங்கள் கையளிப்பு..!

2010-11-09T14:56:00.002+05:30

வடபகுதி வைத்தியசாலைகளுக்கென மூன்று அம்பியுலன்ஸ் வண்டிகளும், இரண்டு நடமாடும் பற்சிகிச்சை கிளினிக் வாகனங்களும் இன்று கையளிக்கப்படவுள்ளன. வவுனியாவிலுள்ள பிராந்திய சுகாதார சேவைகள் பணிப்பாளர் அலுவலகத்தில் நடைபெறவுள்ள வைபவத்தின்போது வடமாகாண ஆளுநர் மேஜர்ஜெனரல் ஜி.ஏ.சந்திரசிறி இந்த வாகனங்களை இன்று கையளிக்கவுள்ளார். அம்பியுலன்ஸ் வண்டிகள் மற்றும் நடமாடும் பற்சிகிச்சை கிளினிக் வண்டிகளுக்கென வடமாகாண சபை 150லட்சம் ரூபாவை செலவு செய்துள்ளதாக வடமாகாண ஆளுநர் ஜி.ஏ. சந்திரசிறி தெரிவித்துள்ளார். மன்னார், முல்லைத்தீவு மற்றும் வவுனியா ஆகிய வைத்தியசாலைகளுக்கு தலா ஒவ்வொரு அம்பியுலன்ஸ் வண்டிகளும், யாழ்ப்பாணம் மற்றும் வவுனியா வைத்தியசாலைகளுக்கு தலா ஒவ்வொரு நடமாடும் பற்சிகிச்சை கிளினிக் வாகனங்களும் வழங்கப்படவுள்ளதாக தெரிவித்துள்ளார்.

வடக்கு, கிழக்கு உள்ளுர் சேவை அபிவிருத்திக்கு உலக வங்கி 5.75 பில்லியன் கடனுதவி..!

2010-11-09T14:53:00.001+05:30

வடக்கு, கிழக்கு மாகாணங்களின் உள்ளுர் சேவை அபிவிருத்தித் திட்டத்துக்கு உலக வங்கி 5.75 பில்லியன் (575 கோடி) ரூபா கடனுதவி வழங்கியுள்ளது. இதன்கீழ் வடக்கு, கிழக்கு மாகாணங்களிலுள்ள உள்ளூ ராட்சி சபைகளின் சேவைகள் அபி விருத்தி செய்யப்படவிருப்பதாக நிதி மற்றும் திட்டமிடல் அமைச்சு அறிவித்துள்ளது. இதன் ஊடாக வடக்கு, கிழக்கு மாகாணங்களில் உட்கட்டுமானங்கள், வீதிகள் என்பன புனரமைக்கப்படவிருப்பதுடன், பொதுக் கட்டடங்கள், பாலங்கள் என்பனவும் புனர்நிர்மாணம் செய்யப்படவுள்ளன. அத்துடன், வடக்கு, கிழக்கு மாகாணங்களிலுள்ள 65 பிரதேச சபைகள், வடக்கிலுள்ள 9 நகர சபைகள், கிழக்கிலுள்ள 3 நகரசபைகள் மற்றும் இரு மாகாணங்களிலுமுள்ள மாநகர சபைகளின் சேவைகள் இந்தத் திட்ட த்தின்கீழ் அபிவிருத்தி செய்யப்படவுள்ளன. பொருளாதார அபிவிருத்தி அமைச்சின்கீழ் முன்னெடுக்கப்படவிருக்கும் இந்த மேம்பாட்டுத்திட்டம் 2013ம் ஆண்டு பூர்த்தி செய்யப்படும் என எதிர்பார்க்கப்படுகிறது. இதனைவிட சிறு மற்றும் நடுத்தர தொழில் முனைப்புக்களை அபிவிருத்தி செய்யவும் உலக வங்கி 6.47 மில்லியன் ரூபா கடனாக வழங்கப்படவுள்ளது. சிறிய மற்றும் நடுத்தர தொழில் முனைப்புகளுக்கு குறுகிய, நீண்டகாலக் கடன்கள் இத்திட்டத்தின்கீழ் வழங்கப்படவிருப்பதுடன் உலக பொருளாதார வீழ்ச்சியால் தொழில் முனைப்புகள் எதிர்கொள்ளும் நிதிப் பிரச்சினைகளுக்கும் கடனுதவி வழங்கப்படவுள்ளது. இதன்மூலம் வேலைவாய்ப்பு பிரச்சினையைக் குறைத்து சிறிய மற்றும் நடுத்தர தொழில் முனைப்புகள் தொழில் வாய்ப்புக்களை ஏற்படுத்த முடியுமென எதிர்பார்க்கப்படுகிறது. நிதி நிறுவனங்களுக்கு கடன் உதவிகளை வழங்கி முதலீடுகளை ஊக்குவிப்பதற்கும் நடவடிக்கை எடுக்கப்படவுள்ளது. இதேவேளை, இலங்கையின் உல்லாசப் பயணத்துறையின் அபிவிருத்திக்கும் உலக வங்கி உதவிகளை வழங்கவுள்ளது. இதன்படி 18 மில்லியன் அமெரிக்க டொலர்கள் கடனுதவியாக உல்லாசப் பயணத்துறை அபிவிருத்திக்கு வழங்கப்படவுள்ளது. இதனைக் கொண்டு கிழக்கு மாகாணத்தை உல்லாசப் பயண மையமாக அபிவிருத்தி செய்யவும் உத்தேசிக்கப்பட்டுள்ளது.

கொழும்பு வெலிக்கடை சிறைச்சாலையில் தாக்குதல் பற்றி விசாரணை..!

2010-11-09T14:49:00.000+05:30

கொழும்பு வெலிக்கடை சிறைச்சாலையில் நேற்று முன்தினம் திடீர் சோதனை மேற்கொள்ள சென்ற பொலிஸார்மீது கைதிகளால் நடத்தப்பட்ட தாக்குதல் சம்பவம் தொடர்பாக பல்வேறு கோணங்களில் விரிவான விசாரணைகள் முன்னெடுக்கப்பட்டு வருகின்றன. சிறைச்சாலை திணைக்களமும், பொலிஸ் திணைக்களமும் இந்த சம்பவம் தொடர்பாக தனித்தனியாக விசாரணைகளை ஆரம்பித்துள்ளன. மேற்படி தாக்குதல் சம்பவத்தின் பின்னணி, தாக்குதல்களுக்கு பயன்படுத்தப்பட்ட பொருட்கள் எவ்வாறு கைதிகள் உள்ள பிரிவுக்குக் கொண்டவரப்பட்டன என்பன தொடர்பாக விசேட குற்றப் புலனாய்வு பிரிவு பொலிஸார் விசாரணைகளை மேற்கொண்டு வருவதாக பொலிஸ் ஊடகப்பேச்சாளர், பொலிஸ் அத்தியட்சகர் பிரிஷாந்த ஜயகொடி தெரிவித்துள்ளார். சி.ஐ.டி.யினர் பல்வேறு கோணங்களில் பல குழுக்களாக விசாரணைகளை முன்னெடுத்து வருவதாகவும் அவர் மேலும் தெரிவித்துள்ளார். காயமடைந்த பொலிஸாரும், சிறைக்காவலர்களும் சிகிச்சைக்குப் பின்னர் வீடுகளுக்கு அனுப்பமுடியாத நிலையில் உள்ளதாக தெரிவித்த அவர், அவர்களுக்கு தொடர்ந்தும் சிகிச்சை வழங்கப்பட வேண்டியுள்ளதாகவும் சுட்டிக்காட்டியுள்ளார்.

வெலிக்கடைச் சிறைப்பகுதியில் இராணுவம் குவிப்பு..!

2010-11-08T22:33:00.000+05:30

கொழும்பு, வெலிக்கடை சிறைச்சாலையில் ஏற்பட்ட மோதலை அடுத்து அங்கு இராணுவம் குவிக்கப்பட்டுள்ளது. நேற்றுக்காலை மேற்கொள்ளப்பட்ட தேடுதல் நடவடிக்கை ஒன்றின்போது கைதிகளுக்கும் பொலிஸாருக்குமிடையே ஏற்பட்ட மோதலில் பொலிஸாரும் சிறை உத்தியோகத்தர்களுமாக 50பேர் காயமடைந்துள்ளதாகவும் இதன்காரணமாக பாதுகாப்பை உறுதிப்படுத்தும் வகையில் இரணுவப் படைப்பிரிவு இரண்டும் விஷேட படைப்பிரிவும் அனுப்பிவைக்கப்பட்டிருந்தது.

வாழைச்சேனை. வட்டவான் பிரதேசத்தில் 7 மோட்டார் குண்டுகள் மீட்பு..!

2010-11-08T22:14:00.003+05:30

மட்டக்களப்பு மாவட்டம் வாழைச்சேனை. வட்டவான் பிரதேசத்தில் நேற்றுக்காலை 7 மோட்டார் குண்டுகள் கண்டெடுக்கப்பட்டுள்ளன. இவை பொலிஸாருக்கு கிடைக்கப்பற்ற தகவலின் மூலம் மீட்கப்பட்டுள்ளன. வட்டவான் பிரதேசத்தில் வெற்றுக் காணி ஒன்றில் புதைக்கப்பட்டிருந்த வெடிகுண்டுகளே இவ்வாறு மீட்கப்பட்டுள்ளது. இவற்றை அழிப்பதற்கு நடவடிக்கை எடுக்கப்பட்டுள்ளதாக பொலிஸார் தெரிவித்துள்ளனர்.

வெலிக்கடைச் சிறையில் பொலீசார்மீது கைதிகள் தாக்குதல், விசாரணைகள் தொடர்கின்றன..!

2010-11-08T21:27:00.000+05:30

கொழும்பு, வெலிக்கடை சிறைச்சாலையில் நேற்றுக்காலை திடீர் சோதனை மேற்கொள்ள சென்றிருந்த விசேட பொலிஸ் குழுமீது கைதிகள் நடத்திய தாக்குதலில் 45 பொலிஸாரும், 5 சிறைக்காவலர்களும் காயமடைந்தனர். வெலிக்கடை சிறைச்சாலையில் விளக்கமறியல் கைதிகள் தடுத்துவைக்கப்பட்டிருந்த பிரிவில் சோதனை நடத்திக் கொண்டிருக்கும்போதே தாக்குதல் நடத்தப்பட்டுள்ளது. இச்சம்பவத்தில் காயமடைந்த ஐம்பது பேரும் கொழும்பு தேசிய வைத்தியசாலையில் அனுமதிக்கப்பட்டுள்ளனர். வெலிக்கடை சிறைச்சாலைக்குள் போதைப்பொருள் பாவனை இடம்பெறுவதாகவும், கைதிகள் சிலர் சட்டவிரோத நடவடிக்கைகளில் ஈடுபட்டு வருவதாகவும் கிடைக்கப்பெற்ற தகவல்களை அடிப்படையாகக் கொண்டு நீதிமன்ற அனுமதியைப் பெற்று விசேட பொலிஸ் குழுவினர் திடீர்தேடுதல் நடவடிக்கையில் ஈடுபட்டுள்ளனர். சிறைச்சாலை அதிகாரிகளின் ஒத்துழைப்புடன் 66 பொலிஸார் அடங்கிய இந்த விசேட குழுவினர் தேடுதல் நடத்திக்கொண்டு இருக்கும்போது குறித்த பிரிவில் தடுத்து வைக்கப்பட்டிருந்த சிறைக்கைதிகள் சிலர் பொலிஸார்மீது கற்களை எறிந்து தாக்குதல் நடத்த ஆரம்பித்துள்ளனர். அதனை அடுத்து ஏனைய கைதிகளும் கற்கள், போத்தல்கள் மற்றும் உபகரணங்களை பயன்படுத்தி தாக்குதல் நடத்தியுள்ளனர். இந்த தாக்குதலை அடுத்து அந்தப் பிரதேசத்தில் பெரும் பதற்ற நிலை ஏற்பட்டுள்ளது. உடனடியாக அங்கு விரைந்த மேலதிக பொலிஸாரும், சிறைக்காவலர்களும், முப்படையினரும் தாக்குதல்களுக்கு உள்ளானவர்களை மீட்டெடுத்துள்ளதுடன் நிலைமையை கட்டுப்பாட்டுக்குள் கொண்டு வந்துள்ளனர். அங்கு விரைந்த விசேட படைப் பிரிவினர் காயமடைந்தவர்களை உடனடியாக கொழும்பு தேசிய வைத்தியசாலைக்கு எடுத்துச் சென்று அனுமதித்துள்ளனர். இவர்களில் சிலர் அவசர சிகிச்சை பிரிவுக்கும் அனுமதிக்கப்பட்டுள்ளனர். அனுமதிக்கப்பட்டவர்களில் அநேகமானவர்களின் தலை மற்றும் உடம்பிலேயே காயங்கள் ஏற்பட்டுள்ளதாக கொழும்பு தேசிய வைத்தியசாலை பணிப்பாளர் டாக்டர் ஹெக்டர் வீரசிங்க தெரிவித்துள்ளார். இதேவேளை, இந்த சம்பவம் தொடர்பான மேலதிக விசாரணைகளை மேற்கொள்ளவென விசேட குற்றப் புலனாய்வு பிரிவு பொலிஸ் (சி.ஐ.டி.) குழுவொன்று நியமிக்கப்பட்டுள்ளதுடன் அந்தக் குழு தமது விசாரணைகளை உடனடியாக ஆரம்பித்துள்ளது.

வடக்கிலுள்ள 120 பாடசாலைகளை மத்திய கல்லூரி தரத்திற்கு மேம்படுத்த நடவடிக்கை..!

2010-11-08T21:23:00.000+05:30

வடக்கிலுள்ள 120 பாடசாலைகளை மத்திய கல்லூரி தரத்திற்கு மேம்படுத்த அரசாங்கம் நடவடிக்கை எடுத்துள்ளது. வட மாகாணத்திலுள்ள ஐந்து மாவட்டங்களைச் சேர்ந்த 120 பின்தங்கிய பாடசாலைகளே இந்த திட்டத்தின்கீழ் தரமுயர்த்தப்படவுள்ளதாக வடமாகாண ஆளுநர் மேஜர்ஜெனரல் ஜி.ஏ. சந்திரசிறி தெரிவித்துள்ளார். இவ்வாறு தரமுயர்த்தப்படவுள்ள பாடசாலைகளின் பெயர்களை பட்டியல் இடுவது தொடர்பாக ஆராயும் இறுதி கலந்துரையாடல் நாளைகாலை 8.30 மணிக்கு இடம்பெறவுள்ளது. ஆளுநரின் தலைமையில் யாழ்ப்பாணம் இந்துக்கல்லூரி, முமாரசுவாமி மண்டபத்தில் நடைபெறவுள்ள இக்கலந்துரையாடலில் வடமாகாண கல்வி அமைச்சின் செயலாளர் எல்.இளங்கோவன், மாகாண கல்விப் பணிப்பாளர் பி.விக்ணேஷ்வரன், பாடசாலை அதிபர்கள், உட்பட உயரதிகாரிகளும் பெற்றோர்கள் மற்றும் பாடசாலை அபிவிருத்திச் சங்க பிரதிநிதிகளும் கலந்து கொள்ளவுள்ளனர்.

வடக்கு, வடகிழக்கு, கிழக்கு வடமேற்கு கடற்பரப்பு கொந்தளிப்பு..!

2010-11-08T13:08:00.003+05:30

ஜல் சூறாவளியின் தாக்கம் காரணமாக இலங்கையின் வடக்கு, வடகிழக்கு, கிழக்கு வடமேற்கு கடற் பரப்பு இரண்டொரு தினங்களுக்குக் கொந்தளிப்பாக இருக்கும் என்று வானிலை அவதான நிலையத்தின் வானிலையாளர் தமயந்தி இந்திஹெட்டி ஹேவகே நேற்று தெரிவித்துள்ளார். வடக்கு, வடகிழக்கு, வடமேற்கு கடல்பரப்பு கொந்தளிப்பாகக் காணப்படுவதால் கடற்றொழிலில் மீனவர்கள் ஈடுபடுவதை தவிர்த்துக்கொள்ள வேண்டும் எனவும் அவர் குறிப்பிட்டுள்ளார். ஜல் சூறாவளி இலங்கைக்கு அப்பால் சென்றுவிட்டது. என்றாலும் இச்சூறாவளியின் தாக்கம் காரணமாக வடக்கு, வடகிழக்கு, வடமேற்கு கடல் கொந்தளிப்பாக உள்ளது. இக் கடற்பரப்பில் தொடராக இடிமின்னலுடன் மழைபெய்யும் அதேநேரம் இக் கடற்பரப்பில் காற்றின் வேகம் அதிகரித்துக் காணப்படும். காற்று வடமேற்காக வீசும். இப்பிரதேசங்களில் மணித்தியாலத்திற்கு 30 - 50 கிலோ மீற்றர் வேகத்தில் காணப்படும் காற்று 60 - 70 கிலோ மீற்றர்கள் வரையும் அதிகரிக்க முடியும். இதன் காரணத்தினால் மீனவர்கள் கடற்றொழிலில் ஈடுபடுவதைத் தவிர்த்துக்கொள்ள வேண்டும் என்றும் அவர் தெரிவித்துள்ளார்.

நீர்கொழும்பில் துப்பாக்கிச்சூடு, ஒருவர் உயிரிழப்பு..!

2010-11-08T13:05:00.001+05:30

நீர்கொழும்பு கிம்புலாபிட்டிய பிரதேசத்தில் நேற்று இடம்பெற்ற துப்பாக்கிச்சூட்டு சம்பவத்தில் ஒருவர் கொல்லப்பட்டுள்ளார். நீர்கொழும்பு, கிம்புலாபிட்டிய, பெல்வேலான பிரதேசத்தைச் சேர்ந்த 35 வயதான நபர் ஒருவரே சம்பவத்தில் உயிரிழந்துள்ளார். இனந்தெரியாத நபர்களினால் மேற்கொள்ளப்பட்ட துப்பாக்கிப் பிரயோகத்தில் குறித்த நபர் உயிரிழந்துள்ளார். சந்தேகநபர்கள் தப்பிச் சென்றுள்ளதாகவும், சந்தேக நபர்களை கைதுசெய்வதற்காக விசாரணைகள் ஆரம்பிக்கப்பட்டுள்ளதாகவும் பொலிசார் அறிவித்துள்ளனர்.

பன்குளம் தமிழ் கிராமத்தில் திட்டமிட்ட சிங்களக் குடியேற்றம்..!

2010-11-08T13:01:00.003+05:30

திருமலையின் புறநகர் பகுதியிலுள்ள பழம்பெரும் தமிழ் கிராமமான பன்குளம் கிராமத்தில் சமீபகாலமாக அரசாங்கம் திட்டமிட்டு சிங்கள குடும்பங்களை குடியேற்றி வருகின்றது. திருமலையிலிருந்து வவுனியா செல்லும் வீதியிலேயே பன்குளம் கிராமம் உள்ளது. இங்கு காலம்தொட்டு தமிழர்கள் வாழ்ந்துவந்த இடங்களில் தற்போது மெதுமெதுவாக சிங்களவர்கள் குடியேறிவருகின்றனர் .பன்குளம் பிரதான வீதியின் இருமருங்கிலும் இவ்வாறு சிங்களவர்கள் குடியேற்றப்பட்டு வருகின்றனர். இது தமிழரின் பூர்வீக கிராமமாகும். பன்குளம் திருமலையில் நெற்செய்கைக்கு பிரசித்தி பெற்ற இடமாகும் சிங்களவர்கள் குடியேறும் பிரதேசங்களில் உள்ள சிதைவடைந்த தமிழர்களின் வீடுகளும் கோவில்களும் அவை தமிழரின் பூமி என்பதை நிரூபித்துக்காட்டுகின்றன.

பிரபாகரனை காரணம்காட்டிய நிதிசேகரிப்பு தோல்வி..!

2010-11-08T12:58:00.001+05:30

பிரபாகரனை காரணம்காட்டிய நிதிசேகரிப்பு தோல்வி- பிரபாகரன் உயிரிழக்கவில்லை எனப் பிரச்சாரம் செய்து, அதன் ஊடாக மேற்கொள்ளப்பட்ட நிதி திரட்டல் முயற்சி தோல்வியைத் தழுவியுள்ளதாக பயங்கரவாதத் தடுப்பு தொடர்பான நிபுணர் பேராசிரியர் ரொஹான் குணரட்ன தெரிவித்துள்ளார். நோர்வேயை மையமாகக் கொண்டு இயங்கிவரும் பேரின்பநாயகம் சிவகரன் எனப்படும் நெடியவன், பிரபாகரன் உயிருடன் இருப்பதாக பிரச்சாரம் செய்து அதன்மூலம் நிதி திரட்டுவதற்கு முனைப்பு காட்டியதாக குறிப்பிட்டுள்ளார். எனினும், இந்த முயற்சி தோல்வியடைந்துள்ளதாக அவர் சுட்டிக்காட்டியுள்ளார். பிரபாகரன் உயிருடன் இருப்பதாகவும், புலிகள் அமைப்பை மீளமைப்பதற்கு நிதி உதவிகளை வழங்குமாறும் கூறி நெடியவன் புலம்பெயர் தமிழர்களிடம் பணம் திரட்டியுள்ளதாக ரொஹான் குணரட்ன குற்றம் சுமத்தியுள்ளார். நெடியவனின் இந்தப் பிரச்சாரத்திற்கு புலம்பெயர் தமிழ் மக்கள் செவி சாய்க்கவில்லை என அவர் தெரிவித்துள்ளார். தன்னார்வ அடிப்படையில் நிதி திரட்டுதல் மட்டுமன்றி போலியான கடன் அட்டைகள், காசோலை மோசடி, சட்டவிரோத ஆட்கடத்தல் உள்ளிட்ட பல்வேறு சட்டவிரோத வழிகளிலும் பணம் திரட்டுவதற்கான முயற்சி மேற்கொள்ளப்பட்டுள்ளதாகக் குறிப்பிட்டுள்ளார்

தங்காலை நீதிமன்றக் கட்டடத் தொகுதி ஜனாதிபதியால் திறந்துவைப்பு..!

2010-11-07T20:39:00.000+05:30

அம்பாந்தோட்டை மாவட்டம் தங்காலை நகரில் நிர்மாணிக்கப்பட்டுள்ள தங்காலை நீதிமன்றக் கட்டடத் தொகுதியை ஜனாதிபதி மஹிந்த ராஜபக்ஷ இன்று திறந்துவைத்துள்ளார். அம்பாந்தோட்டை மாவட்ட அபிவிருத்தி திட்டத்தின்கீழ் 358 மில்லியன் ரூபா செலவில் நிர்மாணிக்கப்பட்டுள்ள இக்கட்டடத் தொகுதியில் மஜிஸ்திரேட் நீதிமன்றம் மாவட்ட நீதி மன்றம் உயர் நீதிமன்றம் சட்ட உதவி காரியாலயம் தொழில் நியாய சபை என்பவையூம் உள்ளட ங்கியுள்ளதோடு இவை நவீன வசதிகளை கொண்டு நிர்மாணிக்கப்பட்டுள்ளன. இந்நிகழ்வில் சபாநாயகர் சமல் ராஜபக்ஷ பிரதி நீதிஅமைச்சர் ரெஜினோல்ட் குரே உட்பட அமைச்சர்கள் பாராளுமன்ற உறுப்பினர்கள் மற்றும் அதிதிகளும் கலந்து கொண்டிருந்தனர்.

சம்பூர், நீர்கொழும்பு பகுதிகளில் வெடிபொருட்கள் மீட்பு..!

2010-11-07T20:37:00.000+05:30

திருமலை மாவட்டம் சம்பூர் மற்றும் கம்பஹா மாவட்டம் நீர்கொழும்பு ஆகிய பகுதிகளில் மேற்கொள்ளப்பட்ட தேடுதல்களில் பல வெடிபொருட்கள் மீட்கப்பட்டதாக பொலிஸார் தெரிவித்துள்ளனர். சம்பூர் கைமுந்தகுளத்திற்கு அருகில் புலிகள் இயக்கத்தின் பங்கர் ஒன்றுக்குள் மறைத்து வைக்கப்பட்டிருந்த அதிசக்தி வாய்ந்த வெடிபொருட்கள் அடங்கிய 7 சிறிய பக்கெட்டுகள், 10 மிதிவெடிகள், ஒரு சயனைட் குப்பி என்பன மீட்கப்பட்டுள்ளன. நீர்கொழும்பு கொப்பரா சந்தியில் வைத்து மன்னாரில் இருந்து மீன் ஏற்றிவந்த லொறியில் இருந்து ஆயிரம் டெடனேட்டர்கள் கண்டுபிடிக்கப்பட்டுள்ளன. என்றும் பொலிஸார் தெரிவித்துள்ளனர்.

50 ஆயிரம் வீடுகள் கட்டும் திட்டத்தைத் துரிதப்படுத்தும்படி இந்தியா இலங்கையிடம் வேண்டுகோள்..!

2010-11-07T20:35:00.000+05:30

மீளக் குடியேறியோருக்கான, இந்தியாவின் 50 ஆயிரம் வீடுகள் கட்டும் திட்டத்தைத் துரிதப்படுத்தும்படி இந்திய அரசாங்கம் இலங்கை அரசாங்கத்திற்கு வேண்டுகோள் விடுத்துள்ளதாக மத்திய உள்துறை அமைச்சர் பீ.சிதம்பரம் தெரிவித்துள்ளார். அமைச்சர் சிதம்பரம், முதலமைச்சர் கருணாநிதியைச் சென்னையில் அவரது இல்லத்தில் நேற்று சந்தித்துள்ளார். இந்த சந்திப்பு முடிந்த பிறகு வெளியே வந்த சிதம்பரம் நிருபர்களுக்கு பேட்டி அளித்துள்ளார். இலங்கையின் வடக்கு மோதலின்போது இடம்பெயர்ந்த 50 ஆயிரம் பேருக்கு வீடுகட்டித்தர வேண்டும் என்ற திட்டம் முன்னேற்றத்தில் இருக்கிறது. விரைவில் கணிசமான முன்னேற்றம் ஏற்பட வேண்டும் என்று இலங்கை அதிபரிடம் வற்புறுத்தி இருக்கிறோம். மழைக்காலம் முடிந்த பிறகு, வீடு கட்டும் பணிகள் தொடங்கும் என்று அவர்கள் வாக்குறுதி அளித்திருக்கிறார்கள் என்றும் அமைச்சர் பீ.சிதம்பரம் மேலும் தெரிவித்துள்ளார்.

வடமேல் மாகாண சபை உறுப்பினர்கள் சீனா பயணம்..!

2010-11-07T20:34:00.000+05:30

வடமேல் மாகாண சபையில் அங்கம் வகிக்கும் 24 மாகாணசபை உறுப்பினர்கள் கடந்த வெள்ளியன்று சீனாவுக்குப் பயணமானார்கள். கல்விச் சுற்றுலா ஒன்றின் நிமித்தம் சீனா சென்றுள்ள இவர்கள் எதிர்வரும் 17ம் திகதி நாடு திரும்பவுள்ளனர். இக்குழுவில் புத்தளம் மாவட்டத்தைச் சேர்ந்த ஆளும் கட்சி உறுப்பினர்கள் ஐந்துபேர் கலந்து கொள்கின்றனர். மாகாண அமைச்சர் சனத் நிஷாந்த, ஏ.எச்.எம். றியாஸ், ஜானக டி. சொய்சா, சிந்தக மாயாதுன்ன, மற்றும் சுமல் திசேரா ஆகியோருடன் குருநாகல் மாவட்டத்தைச் சேர்ந்தோரும் சீனா சென்றுள்ளனர். சுற்றுலாவுக்கு வடமேல் மாகாண சபை 85லட்சம் ரூபாவை ஒதுக்கிட்டுள்ளதாகவும், இக்குழுவில் இரு மாகாணசபை அதிகாரிகள் செல்வதாகவும் சபையின் செயலாளர் எஸ்.ஆர்.ஏ. சமரகோன் தெரிவித்துள்ளார். சுற்றுலாவில் மாகாண சபையில் அங்கம் வகிக்கும் ஆளும் மற்றும் எதிர்கட்சி உறுப்பினர்களும் இடம்பெற்றுள்ளனர். மக்கள் விடுதலை முன்னணியின் மாகாண சபை உறுப்பினர் நிமல் ஹேரத்துக்கு அழைப்பு விடுக்கப்பட்டும், அவர் சுற்றுலாவில் கலந்து கொள்ளவில்லை.

யாழ்ப்பாணத்திற்கு சுற்றுலா மேற்கொள்ளம் சிங்களப் பயணிகளுக்கு விசேட வழிகாட்டல்கள் வழங்கப்பட்டது..!

2010-11-06T16:33:00.003+05:30

யாழ்ப்பாணத்திற்கு சுற்றுலா மேற்கொள்ளம் சிங்களப் பயணிகளுக்கு விசேட வழிகாட்டல்கள் வழங்கப்பட உள்ளதாகத் தெரிவிக்கப்படுகிறது. ஆனையிறவு சந்தியில் வைத்து சிங்கள சுற்றுலாப் பயணிகளுக்கு சில விசேட வழிகாட்டல்கள் வழங்கப்பட உள்ளதாக இராணுவத்தின் ஏழாம் படையணி தீர்மானித்துள்ளது.யாழ்ப்பாண குடா நாட்டில் நிலக்கண்ணி வெடிகள் புதைக்கப்பட்டுள்ள பிரதேசங்கள், கலாச்சார முக்கியத்துவம் வாய்ந்த இடங்கள், வணக்கத் தலங்களில் பின்பற்ற வேண்டிய வழிமுறைகள் போன்றன தனித்தனியாக விளக்கப்படவுள்ளன.சில நபர்களின் கவனயீனத்தினால் பிரச்சினைகள் ஏற்பட வாய்ப்பிருப்பதாக பாதுகாப்புத் தரப்பினர் சுட்டிக்காட்டியுள்ளனர்.வடக்கு தமிழ் மக்களின் உணர்வுகளை காயப்படுத்தாத வகையில் செயற்பட வேண்டும் என்பதனை இந்த வழிகாட்டல்களின் மூலம் தெளிவுபடுத்த உள்ளதாக உயர் இராணுவ அதிகாரியொருவர் குறிப்பிட்டுள்ளார்.

படகு மூலம் இலங்கைக்குள் கடத்த முற்பட்ட இந்தியர்கள் கைது ..!

2010-11-06T16:29:00.002+05:30

30 லட்ச ரூபா பெறுமதியான பீடி வகைகளை சட்டவிரோதமான முறையில் படகு மூலம் இலங்கைக்குள் கடத்துவதற்கு முற்பட்ட இந்தியர்களை இலங்கை கடற்படையினர் கைது செய்துள்ளனர். பீடி வகைகளுடன் நான்கு இந்தியர்களும் கைது செய்யப்பட்டுள்ளதாகத் தெரிவிக்கப்படுகிறது.சிலாவத்துறை கடற்பகுதியில் இந்த மீன்பிடிப் படகினை கடற்படையினர் மடக்கிப் பிடித்துள்ளனர்.கடற்படையினருக்கு கிடைக்கப் பெற்ற தகவல்களின் அடிப்படையில் இந்த சுற்றி வளைப்பு நடவடிக்கை மேற்கொள்ளப்பட்டுள்ளது.குறித்த படகில் சுமார் 750,000 பீடிகள் காணப்பட்டதாகவும், இடத்தை அறிந்து கொள்வதற்காகப் பயன்படுத்தப்படும் ஜீ.எஸ்.பி கருவியொன்று, கையடயக்கத் தொலைபேசி ஒன்று ஆகியனவும் மீட்கப்பட்டுள்ளன.பீடிகளை பாதுகாப்பாக கடத்தும் நோக்கில் பொலித்தீன் பைகளினால் பொதி செய்து இலங்கைக்கு கடத்த முற்பட்டுள்ளதாக கடற்படையினர் தெரிவித்துள்ளனர்.கைது செய்யப்பட்ட இந்தியர்கள் மேலதிக விசாரணைகளுக்காக கல்பிட்டி பொலிஸாரிடம் ஒப்படைக்கப்பட்டுள்ளனர்.

கற்று கொண்ட பாடங்கள் மற்றும் நல்லிணக்க ஆணைக்குழு..!

2010-11-06T16:27:00.001+05:30

கற்று கொண்ட பாடங்கள் மற்றும் நல்லிணக்க ஆணைக்குழு அமர்வுகள் எதிர்வரும் வாரங்களில் யாழ்ப்பாணத்தில் நடத்தப்படவுள்ளதாகாத் தெரிவிக்கப்படுகிறது. இந்த அமர்வுகளின் போது, யாழ்ப்பாண மாவட்டத்தின் பல முக்கியதர்களின் சாட்சியங்கள் பதிவு செய்யப்படும் எனத் தெரிவிக்கப்பட்டுள்ளது. வவுனியா, முல்லைத்தீவு, மட்டக்களப்பு ஆகிய மாவட்டங்களில் பொதுமக்களின் சாட்சிங்கள் ஏற்கனவே பதிவு செய்யப்பட்டிருந்தமை குறிப்பிடத்தக்கது.

இலங்கையின் மிகவும் புரதான இரு விமானங்கள்..!

2010-11-06T16:21:00.003+05:30

இலங்கையின் மிகவும் புரதான இரு விமானங்கள் மக்கள் பார்வைக்காக இன்று வானில் பறக்கின்றன என இலங்கை விமானப்படை அறிவித்துள்ளது. விமானப்படை நூதனசாலையில் காட்சிக்கு வைக்கப்பட்டிருந்த மிகவும் புராதன விமானங்களான 'டய்கர் மொத்' மற்றும் 1982ஆம் ஆண்டு ராஜகீய விமானப் படைக்குச் சொந்தமான 'சிப் மன்க்" ஆகியனவே ரத்மலானை விமான நிலையத்தில் இருந்து பறக்கின்றன. மக்களின் பார்வைக்காக 11.00 மணி வரை விமானங்கள் இரண்டும் பறக்கவுள்ளன.சிப் மன்க்' விமானம் 1951ஆம் ஆண்டு தயாரிக்கப்பட்டு 1982ஆம் ஆண்டு ராஜகீய விமானப் படையில் சேவையில் ஈடுபடுத்தப்பட்டது.

மட்டக்களப்பில் பயங்கர காற்று : கடல் கொந்தழிப்பு..!

2010-11-06T08:11:00.000+05:30

கிழக்கு மாகாணத்தில் நேற்று முதல் கடுமையான கடல் கொந்தளிப்பான நிலை காணப்படுகின்றது. இதனால் மீனவர்கள் யாரும் கடலுக்குச்செல்லமுடியாத சூழல் ஏற்பட்டுள்ளதை அவதானிக்க முடிகின்றது.திருகோணமலை கடற்பரப்பில் ஏற்பட்டுள்ள தாழமுக்கமே இதற்கான காரணம் என மாவட்ட வானிலை அவதான நிலைய பொறுப்பதிகாரி எஸ்.சூரியகுமார் தெரிவித்தார்.மட்டக்களப்பு மாவட்டத்தில் கடல் பேரிரைச்சலுடன் காணப்படுகின்றது. இன்று பிற்பகல் காத்தான்குடி உட்பட பல கரையோர பகுதிகளில் கடல் அலைகள் வழமையான இடத்தை விட முன்னோக்கி வருவதையும் அவதானிக்க முடிந்தது.கடலுக்குச் செல்ல வேண்டாமென மீனவர்களை வானிலை அவதான நிலையம் அறிவுறுத்துகின்றது.

நான் குழந்தை அல்ல : எதிர்க்கட்சிகளைச் சாடுகிறார் ராகுல் காந்தி..!

2010-11-06T08:10:00.000+05:30

நான் குடிசைக்கு சென்று மக்கள் குறை கேட்பதை எதிர்க்கட்சிகள் கேலி செய்கின்றன. என்னை குழந்தை என்றுm அழைக்கின்றனர். ஆனால் நான் ஒன்றும் குழந்தை அல்ல என்பதை சொல்லிக் கொள்ள விரும்புகிறேன் என்று காங்கிரஸ் பொதுச் செயலாளர் ராகுல்காந்தி கூறினார்.தனது சுற்றுப் பயணத்தின் போது திடீர் என்று ஏழைகளின் வீடுகளுக்கு சென்று சாப்பிடுவது, அவர்களது குறைகளை கேட்பது என வாடிக்கையாக கொண்டுள்ளார் ராகுல் காந்தி.சமீபத்தில் அவர் பாதுகாப்பு வளையத்தை மீறி கோரக்பூரில் இருந்து மும்பைக்கு 36 மணி நேரம் ரயிலில் பயணம் மேற்கொண்டார்.பல்வேறு மாநிலங்களில் இருந்து மும்பைக்கு வேலை தேடி செல்பவர்களின் இன்னல்களை நேரடியாக அறிந்து கொள்வதற்காக அவர் ரயில் பயணிகளிடம் சகஜமாக உரையாடினார்.அவரது இதுபோன்ற முன்னறிவிப்பில்லாத பயணங்களால் பாதுகாப்பு அளிப்பதில் பிரச்சினைகள் ஏற்படும் என்று அதிரடிப்படையினருக்கு உத்தரபிரதேச பொலிஸ் எச்சரித்தது.இந்த நிலையில் பீகாரில் தேர்தல் பிரசாரத்தில் ஈடுபட்டிருந்த ராகுல்காந்தி, ஜகனாபாத் என்ற இடத்துக்குக் காரில் சென்று கொண்டு இருந்தார்.எதிர்க்கட்சிகள் கேலி அப்போது திடீர் என்று காரை நிறுத்தி பொதுக் கூட்டம் நடைபெறும் பிரதான நுழைவு வாயில் அருகே இருந்த தெருவோர வியாபாரியின் குடிசைக்குள் ராகுல்காந்தி நுழைந்தார்.அவருடன் பாதுகாப்புக்கு வந்த அதிரடிப்படையினர் திகைத்துப் போய் விட்டனர். ராகுல் வருகையை சற்றும் எதிர்பார்க்காத தெருவோர வியாபாரி குடும்பத்தினர் வியப்பும், மகிழ்ச்சியும் அடைந்தனர். ராகுலை அவர்கள் உற்சாகத்துடன் வரவேற்றார்கள்.சிறுமி உட்பட அங்கு இருந்தவர்களிடம் ராகுல் காந்தி கைகுலுக்கி மகிழ்ந்தார். அவர்களது குறைகளை கேட்டு விடைபெற்றார்.
பின்னர் மேடை ஏறி பேசிய ராகுல்காந்தி தான் குடிசைக்கு சென்றதைக் குறிப்பிட்டுப் பேசினார்.
“நான் குடிசைக்குச் சென்று மக்கள் குறை கேட்பதை எதிர்க்கட்சிகள் கேலி செய்கின்றனர். என்னை பச்சா (குழந்தை) என்று அழைக்கின்றனர். ஆனால் நான் ஒன்றும் குழந்தை அல்ல என்பதை சொல்லிக் கொள்ள விரும்புகிறேன்” என்று கூறினார் அவர்.- வீரகேசரி

வடக்கில் முஸ்லிம்களை மீளக்குடியமர்த்துவதில் அரசு அலட்சியம் : ஸ்ரீலமுக..!

2010-11-06T08:07:00.000+05:30

வடபகுதியிலிருந்து வெளியேற்றப்பட்ட முஸ்லிம்களை மீளக்குடியேற்றுவதில் அரசு ஆக்கபூர்வமான நடவடிக்கை மேற்கொள்ளவில்லை என முஸ்லிம் காங்கிரஸ் செயலாளர் ஹசன் அலி வீரகேசரி இணையத்தளத்திற்குத் தெரிவித்தார்.அவர் மேலும் தெரிவிக்கையில்,ஏனைய பிரதேசங்களில் இருந்து இடம்பெயர்ந்த மக்களுடன் முஸ்லிம் மக்களை ஒன்றிணைத்துப் பார்க்க முடியாது. ஏனெனில் இது இடம்பெயர்வல்ல. வடபகுதியிலிருந்து 1990களில் முஸ்லிம்கள் பலாத்காரமாக வெளியேற்றப்பட்டனர்.இது இனச் சுத்திகரிப்பாகும். எனவே முஸ்லிம் மக்களை அவர்களது சொந்த இடங்களில் மீளக்குடியமர்த்துவது தொடர்பில் அரசு முக்கியத்துவம் கொடுக்க வேண்டும்.வடபகுதியிலிருந்து இடம்பெயர்ந்து புத்தளத்தில் தங்கியுள்ள முஸ்லிம் மக்களை, புத்தளத்தில் அல்லது மன்னாரில் உடனடியாகப் பதிய வேண்டும் என்று தேர்தல் திணைக்களம் நெருக்கடி கொடுத்துள்ளது. இது வடபகுதி முஸ்லிம்களை கூறுபோடும் செயலாகும்.20 வருடகால பிரச்சினைக்கு இரு வாரங்களுக்குள் தீர்வு காணப்போவதாகக் கூறி எதுவித வசதியுமற்ற காடுகளுக்குள் குடியேற்றுவதற்கான முயற்சி மேற்கொள்ளப்பட்டு வருகின்றது. அரசின் மீள்குடியேற்றங்கள் முறையானதாக அமையவில்லை.அரசு இம்மக்களை சொந்த இடங்களுக்கு மீளக்குடியமர்த்துவதில் விரைவில் ஆக்கபூர்வமான ஒரு நடவடிக்கை எடுக்க வேண்டும்”என்றார்

தாயாரைப் பார்க்க பிள்ளைகளுக்கு… பிரபாகரனின் சகோதர சகோதரிகளுக்கு… இலங்கை அரசு அனுமதி மறுப்பு..!

2010-11-06T08:06:00.000+05:30

பிரபாகரனின் சகோதர சகோதரிகளை இலங்கைக்குள் வரவிடுமாறு விடுத்த கோரிக்கையை இலங்கை அரசு நிராகரித்துள்ளதாக செய்திகள் வெளியாகியுள்ளன. திவயின சிங்கள ஊடகம் வெளியிட்ட செய்தியை மேற்கோள் காட்டி இலங்கை இணைய தளங்களில் இந்தச் செய்தி வெளியாகியுள்ளது.பிரபாகரனின் மூத்த சகோதரி வினோதினி ராஜரத்னம், இளைய சகோதரி மற்றும் சகோதரர் ஆகியோர் இலங்கைக்குள் வர அனுமதியளிக்குமாறு முன்னதாக கோரிக்கை விடுக்கப்பட்டிருந்தது.தமிழ்த் தேசியக் கூட்டமைப்பின் முன்னாள் நாடாளுமன்ற உறுப்பினர் எம்.கே. சிவாஜிலிங்கம், உடல் நலக் குறைவால் பாதிக்கப்பட்டுள்ள பிரபாகரனின் தாயார் பார்வதியம்மாள் வெளிநாட்டிலுள்ள தமது பிள்ளைகளைப் பார்க்க விரும்புவதாகத் தெரிவித்ததால், இலங்கை அரசிடம் கோரிக்கை விடுத்திருந்தார்.வல்வெட்டித்துறை பகுதியில் பிரபாகரன் சகாக்களுடன் இவர்கள் சந்திக்க உள்ளனர் என இலங்கை புலனாய்வுப் பிரிவினர் தெரிவித்ததை அடுத்து, அரசாங்கம் இவர்களுக்கு அனுமதி வழங்குவதை நிராகரித்துள்ளதாக அந்தச் செய்தியில் தெரிவிக்கப்பட்டுள்ளது.மேலும், தமது சகோதரரை இலங்கை இராணுவத்தினரால் தொடக்கூட முடியாது என வினோதினி தெரிவித்திருந்ததாகவும் திவயின சிங்கள ஊடகம் சுட்டிக்காட்டியுள்ளதாக இலங்கை இணைய தளங்களில் தெரிவிக்கப்பட்டுள்ளது.

வட மாகாண விவசாயத்துக்கென ஆறரை கோடிரூபா பெறுமதியான 52 உழவு இயந்திரங்கள் அன்பளிப்பு..!

2010-11-01T19:02:00.000+05:30

வட மாகாண விவசாய நடவடிக்கைகளுக்கென சுமார் ஆறரை கோடிரூபா பெறுமதியான 52 உழவு இயந்திரங்களை இந்திய அரசாங்கம் இலங்கைக்கு அன்பளிப்பாக வழங்குகின்றன. வட மாகாணத்துக்கான ஜனாதிபதி விசேட செயலணியின் தலைவரும் பொருளாதார அபிவிருத்தி அமைச்சருமான பசில் ராஜபக்ஷவிடம் 52 உழவு இயந்திரங்களையும் இலங்கையிலுள்ள இந்திய உயர்ஸ்தானிகர் அசோக் கே. காந்த் உத்தியோகபூர்வமாக கையளிக்கவுள்ளார். கொழும்பு காலிமுகத்திடலில் நேற்றுமாலை 4.00 மணிக்கு நடைபெறவுள்ள இந்நிகழ்வில் வட மாகாண ஆளுநர் மேஜர் ஜெனரல் ஜீ.ஏ. சந்திரசிறி உட்பட முக்கியஸ்தர்கள் பலர் கலந்து கொள்ளவுள்ளனர். இந்திய அரசாங்கத்தினால் வழங்கப்படவுள்ள இந்த உழவு இயந்திரங்களை இலங்கை அரசின் சார்பில் பொறுப்பேற்கும் அமைச்சர் பசில் ராஜபக்ஷ வடமாகாண ஆளுநரிடம் கையளிக்கவுள்ளார்.

கிண்ணியா, கண்டாக்காடு மக்களை விரட்டப்பட்டு குடிசைகள் எரிப்பு..!

2010-11-01T18:58:00.000+05:30

அத்துமீறிய குடியேற்றம் எனக்கூறி மீள்குடியேறிய திருமலை, கிண்ணியா, கண்டாக்காடு மக்களை விரட்டியதோடு அவர்களது குடிசைகளையும் ஒரு குழுவினர் எரித்து நாசப்படுத்தியுள்ளனர். கிழக்கு மாகாண ஆளுநரின் கட்டளைக்கமைய மூன்று வாகனங்களில் வந்த பொலிஸாரே இத்தகைய நடவடிக்கைகளில் ஈடுபட்டதாக கூறப்படுகிறது. இப்பகுதியில் சுமார் 300ற்கும் மேற்பட்ட ஆண்டுகளாகத் தாம் குடியிருந்து பயிர்செய்து வருவதாக அப்பகுதி மக்கள் தெரிவிக்கின்றனர். இவ்விடயம் சம்பந்தமாக கிண்ணியா பிரதேச செயலாளர் எம்.முபாரக்கிடம் கேட்டபோது, அரசஅதிபரின் அனுமதியுடனேயே இவர்கள் குடியேற்றம் செய்யப்பட்டதாகவும் அவர்களின் காணி என்பதற்கான உறுதிப்பத்திரம், தேர்தல் இடாப்பு, பிறப்பு அத்தாட்சிப் பத்திரம், தேசிய அடையாள அட்டை என்பனவும் கண்டாக்காடு என்ற பெயரிலேயே உள்ளதாகவும் தெரிவித்துள்ளார்.

கையடக்கத் தொலைபேசியூடாக ஆபாசப்படங்களைப் பார்வையிடும் இணையங்கள் 300 ஐத் தடைசெய்ய நடவடிக்கை..!

2010-11-01T18:55:00.000+05:30

கையடக்கத் தொலைபேசியூடாக ஆபாசப்படங்களைப் பார்வையிடும் இணையங்கள் 300 ஐத் தடைசெய்ய அல்லது அவற்றைப் பார்வையிடமுடியாத வாறு தடுப்புக்களை ஏற்படுத்த நடவடிக்கைகளை எடுக்கும் படி பத்தரமுல்லை சிறுவர் மற்றும் மகளிர் நீதிமன்றம் உத்தரவிட்டுள்ளது. தொலைத்தொடர்புகள் ஒழங்குபடுத்தல் ஆணைக் குழுவிற்கு இவ்வாறு உத்தரவு விடுக்கப்பட்டுள்ளது. இவ்வாறு இது வரை மொத்தம் 547 இணையங்கள் தடைசெய்யப்பட்டுள்ளன. அவற்றுள் 185ல் இலங்கை இளைஞர் யுவதிகள் மற்றும் சிறுவர்கள் இதில் பங்கெடுத்துள்ளதாகவும் மேலும் தெரியவருகிறது.

உலக எக்ஸ்போ கண்காட்சியின் இறுதி நிகழ்வில் ஜனாதிபதி பங்கேற்பு..!

2010-11-01T18:52:00.000+05:30

ஷங்காயில் நடைபெற்றுவரும் உலக எக்ஸ்போ கண்காட்சியின் இறுதி நிகழ்வில் ஜனாதிபதி மஹிந்த ராஜபக்ஷ நேற்று கலந்து கொண்டுள்ளர். இதன்போது சீனாவின் பிரதமர் உட்பட பல நாட்டு பிரதமர்களும் கலந்து கொண்டிருந்தனர். கச்சத்தீவு அருகே மீன்பிடித்து கொண்டிருந்த இராமேசுவரம் மீனவர்களை தாக்கிய இலங்கை கடற்படையினர் பணம் மற்றும் படகில் இருந்து இறால், மீன்களை கொள்ளையடித்துச் சென்றுள்ளதாக குற்றம் சுமத்தப்பட்டுள்ளது. தொடர்ச்சியாக இவ்வாறான பிரச்சினைகளுக்கு தாம் முகங்கொடுப்பதாகவும் அரசியல்ரீதியில் தமக்கு எந்தவொரு சாதகமான பதிலும் கிடைக்கவில்லை என்றும் மீனவர்கள் கருத்து தெரிவித்துள்ளனர். கடற்படையினரின் தாக்குதலைக் கண்டித்து இராமேஸ்வரம் விசைப்படகு மீனவர்கள் கடந்த 23 நாட்களாக வேலைநிறுத்தத்தில் ஈடுபட்டனர். மாவட்ட ஆணையாளருடனான பேச்சுவார்த்தையைத் தொடர்ந்து மீண்டும் நேற்றுமுன்தினம் இரவு தொழிலுக்குச் சென்றுள்ளனர். அதன்போது அவர்கள் மீண்டும் தாக்கப்பட்டதாக இந்தியச் செய்திகள் தெரிவிக்கின்றன. இலங்கை கடற்படையினர் தாக்குவதாகக் கூறப்படுவதில் எவ்வித உண்மையும் இல்லை என்றும் தமிழக அரசியல்வாதிகளின் படகுகள் இலங்கைக் கடல் எல்லைக்குள் அத்துமீறி வருவதாகவும் நீரியல்வளத்துறை அமைச்சர் ராஜித சேனாரத்ன அண்மையில் கருத்து வெளியிட்டிருந்தமை குறிப்பிடத்தக்கது.

தமிழ்க் கட்சிகள் அரங்கத்தின் மற்றுமொரு சந்திப்பு எதிர்வரும் 03ம்திகதி..!

2010-11-01T18:49:00.000+05:30

தமிழ்க் கட்சிகள் அரங்கத்தின் மற்றுமொரு சந்திப்பு எதிர்வரும் 03ம்திகதி முற்பகல் 10மணியளவில் கொழும்பில் இடம்பெறவுள்ளது. இந்த சந்திப்பு தொடர்பாக அனைத்துத் தமிழ்க் கட்சிகளுக்கும் அழைப்பு விடுக்கப்பட்டுள்ளத

ஜனாதிபதி மகிந்த ராஜபக்ச நேபாள ஜனாதிபதி சந்திப்பு..!

2010-10-31T22:11:00.003+05:30

சீனாவிற்கான உத்தியோகபூர்வ விஜயத்தை மேற்கொண்டுள்ள ஜனாதிபதி மகிந்த ராஜபக்ஷ நேபாள ஜனாதிபதி யன்பிரன் யாதேவை சந்தித்து கலந்துரையாடியுள்ளார். இதன்போது இருதரப்பு உறவுகள், நேபாள அரசியல் நெருக்கடிகள் மற்றும் நேபாளத்திற்கும் இலங்கைக்குமிடையிலான வர்த்தகம் என்பன பற்றி ஆராய்ந்துள்ளார். அதேவேளை சங்காயில் இன்று நடைபெற்ற எக்ஸ்போ 2010 கண்காட்சியின் இறுதிநாள் நிகழ்வில் ஜனாதிபதி மகிந்த ராஜபக்ஷ பங்கேற்றுள்ளார். சிறந்த வாழ்விற்கு சிறந்த நகரம் என்ற தொனிப் பொருளின் அடிப்படையிலேயே இந்த கண்காட்சி ஏற்பாடு செய்யப்பட்டுள்ளது.

நாட்டில் அனைவருமே அச்சத்துடன் வாழ்ந்து வருகின்றனர்-ஐ.தே.கட்சி..!

2010-10-31T22:09:00.002+05:30

நாட்டில் அனைவருமே அச்சத்துடன் வாழ்ந்து வருவதாக ஐ.தே.கட்சியின் தலைவர் ரணில் விக்ரமசிங்க தெரிவித்துள்ளார். அமைச்சரவை அமைச்சர்கள், பாராளுமன்ற உறுப்பினர்கள், ஊடகவியலாளர்கள் மற்றும் பொதுமக்கள் ஆகிய அனைவருமே அச்சத்துடன் வாழ்ந்து வருவதாக அவர் சுட்டிக்காட்டியுள்ளார். 1999ம் ஆண்டு நகர மண்டபத்தில் முன்னாள் ஜனாதிபதி சந்திரிக்கா பண்டாரநாயக்கவை படுகொலை செய்வதற்காக வைக்கப்பட்ட குண்டை கொழும்பிற்கு எடுத்துச் செல்லுமாறு உத்தரவிட்ட நபர் இன்று ஆளும்கட்சி அமைச்சர் என அவர் குறிப்பிட்டுள்ளார். புலிகளைத் தோற்கடித்து நாட்டுக்கு சுதந்திரத்தைப் பெற்றுக்கொடுத்த படைத்தளபதி இன்று சிறையில் வாடுவதாக அவர் தெரிவித்துள்ளார். சுவரொட்டி ஒன்றை ஒட்டுவதற்குக் கூட நாட்டில் சுதந்திரமில்லை என அவர் குறிப்பிட்டுள்ளார்.

**பூர்வீகம்**